«Ես հեռու եմ էն մտքից, որ մեզ հաջողվելու է արդար և թափանցիկ ընտրություններ անցկացնել»․ Բաբաջանյանը՝ Հովակիմյանին

Այսօր՝ ԱԺ արտահերթ նիստի ժամանակ, անկախ պատգամավոր Արման Բաբաջանյանը, դիմելով «Իմ քայլը» խմբակցության պատգամավոր Վահագն Հովակիմյանին, ասաց․ «Ենթադրում եմ, որ ձեր բերած փոփոխությունները խիստ կարևոր են ընտրական պրոցեսի համար։ Իհարկե, ես հեռու եմ էն մտքից, որ մեզ հաջողվելու է ազատ, արդար թափանցիկ ընտրություններ անցկացնել, որովհետև ձեր թողտվությամբ ընտրական պրոցեսում ներգրավել են արդեն քաղաքական որոշ շրջանակներ, որոնք շատ հեռու են այդպիսի ընտրություններ անցկացնելու հեռանկարից»։

Ի պատասխան Արման Բաբաջանյանի՝ Վահագն Հովակիմյանն ասաց․ «Ես ձեր պեսիմիզմը չեմ կիսում․ համոզված եմ, որ մեզ հաջողվելու է ազատ արդար և թափանցիկ ընտրություններ կազմակերպել»։

Հիշեցնենք, որ այսօր ԱԺ արտահերթ նիստում քննարկվում է ՀՀ քրեական օրենսգրքում փոփոխություններ և լրացումներ կատարելու մասին հարցը։

Քրեական օրենսգրքում փոփոխությամբ առաջարկվում է պատասխանատվություն նախատեսել բոլոր այն դեպքերի համար, երբ ընտրական գործընթացի խոչընդոտման արդյունքում տեղամասում քվեարկության արդյունքները անվավեր են ճանաչվում: Նախագծով առաջարկվում է նախընտրական քարոզչության խոչընդոտման, տեղամասային կենտրոնում կամ տեղամասի մուտքի մոտ բռնություն գործադրելու կամ դրա սպառնալիքի համար ևս նախատեսել քրեական պատասխանատվություն: