«Այդպես խոսողներին կառաջարկեի գնալ Սյունիք, կանգնել Շուռնուխում և նման կերպ խոսել»․ Աննա Գրիգորյան

Այսօր՝ ԱԺ արտահերթ նիստի ժամանակ, անկախ պատգամավոր Աննա Գրիգորյանը, անդրադառնալով վարչապետի այցով պայմանավորված Սյունիքում տեղի ունեցած դեպքերին և դրանից հետո տեղի ունեցող քննարկումներին, ասաց․ «Իհարկե, այս ամբիոնից կարելի է ասել՝ սյունեցին այսպիսին պետք է լինի և այնպիսին չպետք է լինի․․․ Ի՞նչ է, դո՞ւք եք որոշում՝ ինչպիսին պետք է լինի սյունեցին»։

Աննա Գրիգորյանն արգելեց որակումներ տալ սյունեցիներին։

«Իրավական գործընթացո՞վ պետք է անցնեն մարդիկ, թող անցնեն․ դո՞ւք եք որոշում՝ ով է խուլիգանը և ով՝ ոչ։ Այս երեք տարիների ընթացքում մենք սևի և սպիտակի բաժանեցինք մեր հասարակությունը, հիմա այն ներմուծում ենք Սյունիքի մարզ՝ ասելով կան լավ սյունեցիներ, ովքեր մեր կողքին են և ոչ այնքան լավ, այդպես խոսողներին ես, պարզապես, կառաջարկեի գնալ Սյունիք, կանգնել Շուռնուխում և խոսել նման կերպ»։

Գրիգորյանի խոսքով՝ երկրում թիվ մեկ խնդիրը համախմբումը պետք է լինի, ոչ թե բաժանարար գծեր անցկացնելը։

Ադրադառնալով Հրաչյա Հակոբյանի՝ սյունեցիներին բերման ենթարկելու գործընթացի վերաբերյալ հայտարարությանը նշեց, որ խնդրելու է բոլոր խմբակցություններին, որ ստեղծվի էթիկայի հանձնաժողով և քննվի այդ հարցը։