«Երկիրը վերածելու ենք շինհրապարակի. վերանալու են ասֆալտին փռելու տհաճ տեսարանները». Քոչարյան

ՀՀ 2-րդ նախագահ Ռոբերտ Քոչարյանն այսօր իր ելույթի ընթացքում նշեց այն առաջին քայլերը, որոնք կիրականացնի իր դաշինքը, եթե գան իշխանության:

«Առաջին հերթին պետք է գնահատվեն երկրին հասցված վնասների ծավալները բոլոր ոլորտներում: Դրանից հետո անմիջապես պետք է անցնենք հակաճգնաժամային քայլերին՝ կանգնեցնելու անվտանգության և պետական կառավարման հետագա դեգրադացիան. պետք է կանգնեցնենք տնտեսական անկումը...: Մենք վաղուց կորցրել ենք վստահելի ընկերոջ համբավը միջազգային ասպարեզում: Սկզբունքորեն կարևոր է, որ ժողովուրդն անմիջապես զգա փոփոխությունները երկրում: Դատարկ խոստումներ չենք տալու: Մեր հաջողության գրավականը լինելու է արհեստավարժությունը, փորձը, ջանասիրությունը, կարգապահությունը և սերը երկրի նկատմամաբ: Առաջարկելու ենք աշխատող երկրի կոնցեպտը, նորից երկիրը վերածելու ենք շինհրապարակի, առաջնային խնդիր է դառնալու տասնյակ հազարավոր նոր աշխատատեղերի ստեղծումը ամեն տարի: Վերանալու են բիզնեսի նկատմամբ արհամարհանքը, այդ «ասֆալտին փռելու» տհաճ տեսարանները: Ամեն ինչ արվելու է փոքր և միջին բիզնեսի զարգացման համար: Մենք ունենալու ենք նոր գիտահեն տնտեսություն, զարգացած գյուղատնտեսություն»,- հայտարարեց Ռոբերտ Քոչարյանը: