«Հայաստանի երկաթուղի հասկացություն չկա. մենք Զանգեզուրի միջանցքի հարցը քննարկում ենք ռուսական կողմի հետ». Ալիև

Այսօր Նախիջևանի Օրդուբադ քաղաքում իր ելույթի ժամանակ անդրադառնալով, իր բնորոշմամբ՝ «Զանգեզուրի միջանցքին», Ադրբեջանի ղեկավար Իլհամ Ալիևը հայտարարել է, որ այդ միջանցքը պետք է ու կբացվի: «Ինչ վերաբերում է այն հատվածին, որը գտնվում է Հայաստանի տարածքում, ապա, ինչպես գիտեք, չկա Հայաստանի երկաթուղի հասկացություն: Ռուսական երկաթուղիները տիրապետում են Հայաստանի բոլոր երկաթուղիներին: Նշանակում է, նրանց է պատկանում Հայաստանի երկաթուղին: Ուստի, մենք այս հարցը ավելի շատ քննարկում ենք ռուսական կողմի հետ»,- ասել է Ալիևը: