«Ադրբեջանն առանց Ռուսաստանի կարո՞ղ էր դիմել սահմանային սադրանքի, թե՞ ոչ»․ Հ․ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է․ «Ադրբեջանն առանց Ռուսաստանի կարո՞ղ էր դիմել սահմանային սադրանքի, թե՞ ոչ: Հիշենք՝ Ադրբեջանը խոցել է ռուսական ուղղաթիռ, հետո ներողություն խնդրել, Ռուսաստանն էլ ներել է, իհարկե, խաղաղապահ առաքելության դիմաց: Այդ հանգամանքից հետո քննարկել՝ Ադրբեջանը կարող էր այդ բանն անել առանց Ռուսաստանի համաձայնության, թե ոչ, կարծում եմ՝ պետք է որ չլինի:
Ընդ որում, հատկանշական է մի բան, որ Հայաստանում թե՛ Ռուսաստանին հավատարմություն հայտնող, թե՛ Ռուսաստանի քաղաքականությունը քննադատող հանրային շերտերն ունեն, կարծես թե, մի ընդհանրություն՝ Ռուսաստանի դեմ այստեղ խաղ չկա և չկա մի բան, որ լինի առանց Ռուսաստանի համաձայնության կամ որոշման: Տեխնիկապես, գուցե այդպես է: Ամբողջ հարցն այն է, որ բավականին տևական ժամանակ այդ Ռուսաստանի համաձայնություն ասվածը շատ տարածական է, այսինքն՝ Ռուսաստանը ստիպված է հաշվի առնել շատ-շատ հանգամանքներ, մինչ համաձայնելը կամ դեմ գնալը: Որովհետև Ռուսաստանն այսօր թույլ է, իսկ Կովկասում ՌԴ կարմիր գծերը առնվազն մի հսկայական հատվածով վաղուց վերածվել է կարմիր կետագծերի:
Եվ, ինչպես մի առիթով ասել էի, սկզբունքային նշանակություն ունի, թե մենք ինչ ելակետով ենք դիտարկում իրողությունները՝ ամեն ինչ որոշում է Ռուսաստանը, թե Ռուսաստանն այլևս ամեն ինչ որոշող չէ: Որովհետև, եթե ամեն ինչ որոշում է Ռուսաստանը, ապա անտրամաբանական է այստեղ Ֆրանսիայից, ԱՄՆ-ից, ՄԱԿ ԱԽ-ից խոսելը, միևնույն է, ամեն ինչ որոշում է Ռուսաստանը: Սրանք էական հարցեր են, որոնք պետք է հնարավորինս զատել զգայական ու զգալիորեն նաև խթանվող աղմուկից, եթե խնդիրը քաղաքականություն մշակելու ռացիոնալ դաշտ ձևավորելն է»: