«Պատերազմի ժամանակ «Ղ-Տելեկոմ»-ը տնտեսվարողներին որևէ կերպ չի տեղեկացրել». Արմինե Ավագիմյան

Արցախի Հանրապետության քաղաքացի, տնտեսագետ, գործարար շրջանակների ներկայացուցիչ Արմինե Ավագիմյանը ֆեյսբուքյան իր էջում գրել է. «Այսպիսով, ի պատասխան բազմաթիվ հարցումների, ուզում եմ տեղեկացնել, որ բարձրացրածս հարցի շրջանակներում ավելի քան 3 ամիս առաջ գրավոր դիմել էի «Ղարաբաղ Տելեկոմ»-ին՝ 2020թ. պատերազմական շրջանում ԱՀ-ում գործող տնտեսվարող սուբյեկտներից (այդ թվում՝ ինձնից) ինտերնետի, բջջային, ֆիքսված հեռախոսակապի ծառայությունների դիմաց հաշվարկված, գանձված գումարները անվավեր ճանաչելու ակնկալիքով:
Ցանկանում եմ ողջունել «ՂՏ» ՓԲԸ տնօրինության կողմից կայացրած ուշացած, բայց ողջախոհ որոշումը՝ զրոյացնելու իմ հեռախոսահամարի գծով 2020թ. նոյեմբեր, դեկտեմբեր ամիսների դիմաց առաջացած պարտքը: Սակայն, ցավոք, «ՂՏ»-ի կողմից պարզաբանվել է, որ խոսքը վերաբերում է անձնապես միայն իմ հեռախոսահամարի գծով առաջացած պարտքի ներմանը, ինչը բացարձակապես չի բավարարում իմ խնդրանք-պահանջը՝ զրոյացնել Արցախում գործող բոլոր իրավաբանական անձ և անհատ ձեռնարկատեր հանդիսացող սուբյեկտների կապի ոլորտի բոլոր ծառայությունների գծով առաջացած 2020թ. հոկտեմբեր, նոյեմբեր, դեկտեմբեր ամիսների դիմաց պարտքը:
Կից ներկայացնում եմ 2020թ. պատերազմի օրերին 1 տնտեսվարող սուբյեկտի վրա դուրս գրված «ՂՏ» հաշիվները՝ որպես ապացույց «ՂՏ» և Արցախի Հանրապետության տարածքային կառավարման և ենթակառուցվածքների նախարարության ներկայացուցիչների պնդումների, թե նշված ժամանակահատվածում գումարներ չեն հաշվարկվել և գանձվել: Իսկ ի պատասխան վերջիններիս պնդմանը, որ 2020թ. դեկտեմբերի 1-ից գործում է այլ որոշում, նշեմ, որ տնտեսավարող սուբյեկտները որևէ ձևաչափով չեն իրազեկվել այդ անտրամաբանական, ապօրինի, հետին ամսաթվով հաստատված որոշմանը «ՂՏ» կամ պետական այլ պատկան մարմինների կողմից:
Կրկին անգամ պահանջում եմ սույն հարցի շրջանակներում ընդգրկված բոլոր պատկան մարմիններին մանիպուլյացիաների չդիմել և ի կատար ածել արցախահայությանը տրված խոստումները:
Սիրելի արցախցիներ, ահա իմ նախադեպը, Դուք ևս եղե՛ք պահանջատեր, հետևողական այս և մնացած, ավելի կարևոր ու հրատապ հարցերում, մի թողեք անարդարությունն ու ապօրինություններն անպատասխան, քանզի սա է մեր մի պատառ դարձած Հայրենիքում ապրելու, գործելու, չհեռանալու ճանապարհը, և այլ տարբերակ պարզապես ՉԿԱ»: