«Ժողովրդի թիկունքում հերթական անգամ փաստաթուղթ է նախապատրաստվել». Էդմոն Մարուքյան

«Հենց հիմա հայտարարության տեքստ ենք կազմում, որը հիմք է ծառայելու ԱԺ արտահերթ նիստ գումարելու համար: ՀՀ սահմանադրության և միջազգային պայմանագրերի մասին օրենքով՝ քաղաքական, ռազմական, մարդու իրավունքներին առնչվող որևէ փաստաթուղթ ստորագրելու պարագայում պետք է այն վավերացվի ՀՀ-ում: Ժողովրդի թիկունքում հերթական անգամ փաստաթուղթ է նախապատրաստվել, որի բովանդակությունից տեղեկություն չունեն ո՛չ պատգամավորները, ո՛չ էլ Կառավարության անդամների մեծ մասը»,- լրագրողների հետ ճեպազրույցում ասաց ԼՀԿ ղեկավար Էդմոն Մարուքյանը՝ անդրադառնալով վարչապետի պաշտոնակատարի նշած փաստաթղթին:

Հիշեցնենք՝ Կառավարության նիստի ժամանակ Նիկոլ Փաշինյանը հայտարարել էր. «Այն լուծումները, որոնք այս պահին մեր միջազգային գործընկերների հետ ձեռք են բերված նախնականում, 100 տոկոսով համապատասխանում են ՀՀ շահերին: Այո, եթե Ադրբեջանը էդ պայմանավորվածություններն իրագործի ու էն պայմաններում, ինչ որ խոսել ենք, ես այդ թուղթը ստորագրելու եմ: Ես դա չեմ հրապարակի, որովհետև կոռեկտ չէ՝ աշխատանքային թուղթ է, բանակցություններ են ընթանում և այլն»: