«Ես, կարծես, այդ փաստաթղթին եմ ծանոթացել և հուսամ, որ դա է գոնե ստորագրվելու»․ Թագուհի Թովմասյան

Այսօր՝ լրագրողների հետ ճեպազրույցում, ԱԺ անկախ պատգամավոր Թագուհի Թովմասյանը, անդրադառնալով Միքայել Մինասյանի կողմից հրապարակված փաստաթղթին, ասաց․ «Ինչ վերաբերում է փաստաթղթին, ապա ես, կարծեք թե, այդ փաստաթղթին եմ ծանոթացել և հուսամ, որ այդ փաստաթուղթն է գոնե ստորագրվելու, որտեղ իմ տեղեկություններով մատնանշված է, որ մինչև հունիսի 30-ը պետք է ձևավորվի եռակողմ պայմանավորվածությամբ աշխատանքային խմբեր Հայաստանի, Ռուսաստանի և Ադրբեջանի միջև, որոնք պետք է իրականացնեն սահմանազատման աշխատանքներ»։

«Ի՞նչ սահմաններ են գծելու՝ ամբողջ խնդիրը դրանում է։ Այսինքն՝ մենք ստեղծում ենք հարաբերություններ թշնամական երկրի հետ և երկու կառույց ենք ստեղծում, որոնք պետք է զբաղվեն մեր սահմանների ճշգրտման հարցով, բայց չգիտենք՝ ովքեր են ներառվելու այդ կազմում և ինչ են քննարկելու»։

Թագուհի Թովմասյանը գտնում է, որ պետք է մասնագետներ ընդգրկված լինեն հայկական կողմից, որ կարողանան մասնագիտական աջակցություն ցուցաբերել և, պատգամավորի խոսքով, ամեն սանտիմետրի համար կռիվ տան։