«Փաշինյանը չի կարող շարունակել վարչապետի լիազորությունների ժամանակավոր կատարումը». Արա Զոհրաբյան

Փաստաբանների պալատի նախագահ Արա Զոհրաբյանը ֆեյսբուքյան իր էջում հայտնում է. ««Զարթոնք» ազգային քրիստոնեական կուսակցության և 5165 շարժման կողմից հրավիրված հավաքի ժամանակ ներկայացրել եմ հետևյալը՝
ՀՀ Սահմանադրության 149-րդ հոդվածի 2-րդ մասի համաձայն՝ վարչապետի հրաժարական ներկայացնելու կամ վարչապետի պաշտոնը ԹԱՓՈՒՐ մնալու այլ դեպքերում Կառավարության հրաժարականն ընդունվելուց հետո՝ յոթնօրյա ժամկետում, Ազգային ժողովի խմբակցություններն իրավունք ունեն առաջադրելու վարչապետի թեկնածուներ:
Ինչպես տեսնում ենք սահմանադիրն օգտագործել է «Թափուր մնալ» բառերը: Հետևաբար, վարչապետի հրաժարական ներկայացնելու պահից վարչապետի պաշտոնը ԹԱՓՈՒՐ Է:
Ըստ բացատրական բառարանի «Թափուր» բառը նշանակում է՝ դատարկ, ազատ, չզբաղեցրած, որտեղ ոչինչ չկա, անմարդաբնակ, ամայի:
Վարչապետի հրաժարականի դեպքում, վերջինիս պաշտոնը համարվում է թափուր, այսինքն ազատ, հետևաբար նա չի կարող շարունակել վարչապետի լիազորությունների ժամանակավոր կատարումը: Կառավարության մյուս անդամները՝ փոխվարչապետերը և նախարարները, շարունակում են ժամանակավոր պաշտոնավարել:
Օրենսդրության մեջ էլ նման իրավիճակներում թափուր պաշտոնների հետ կապված կարգավորումները խոսում են հենց այս տրամաբանության մասին: Օրինակ՝ ազգային ժողովի նախագահի պաշտոնը թափուր մնալու դեպքում, ԱԺ նախագահի լիազորությունները կատարում է Ազգային ժողովի նախագահի տեղակալը: ՀՀ նախագահի հրաժարականի դեպքերում մինչև նորընտիր Հանրապետության նախագահի կողմից պաշտոնի ստանձնումը Հանրապետության նախագահի լիազորությունները կատարում է Ազգային ժողովի նախագահը:
Վերոգրյալից ելնելով՝
1. Առաջարկում ենք Մարդու իրավունքների պաշտպանին (Arman Tatoyan) դիմել սահմանադրական դատարան և վարչապետի ժպ հանդես եկող անձի իրավասությունն ըստ էության վիճարկել հետևյալ եղանակով՝ Սահմանադրական դատարան կարող է դիմել ՄԻՊ-ը վարչապետի նորմատիվ իրավական ակտերի վիճարկման հարցով: ՎԺՊ-ն 2021թ. Մայիսի 10-ին կայացրել է թիվ 492-Ն նորմատիվ իրավական ակտը:
2. ՀՀ քրեական օրենսգրքի 300-րդ հոդվածի 2-րդ մասի համաձայն՝ իշխանությունը պահելը՝ Հանրապետության Նախագահի, պատգամավորի, ՎԱՐՉԱՊԵՏԻ, նախարարի լիազորությունների ավարտից հետո այդ լիազորությունների իրականացումը շարունակելը՝ պատժվում է ազատազրկմամբ՝ տասից տասնհինգ տարի ժամկետով:
Նիկոլ Փաշինյանը 2021թ. ապրիլի 25-ից հետո շարունակել է վարչապետի լիազորությունների իրականացումը՝ լիազորությունների ավարտից հետո:
Պատրաստվում ենք հանցագործության մասին հաղորդում ներկայացնել իրավասու մարմնին:
3. Իրազեկում ենք Ռուսաստանի Դաշնության և Ադրբեջանի իշխանություններին, որ Նիկոլ Փաշինյանն իրավունք չունի իրականացնել ՀՀ վարչապետի լիազորությունները: ՀՀ վարչապետի անունից ստորագրված որևէ փաստաթուղթ չի ունենալու իրավասություն և հիմք չի ընդունվելու Հայաստանի Հանրապետության ժողովրդի կողմից»: