Որո՞նք են մի շարք հայկական ԶԼՄ-ներում Իրանի վերաբերյալ հրապարակված լուրերի նպատակները. #Parstoday

Իրանական Parstoday կայքը գրում է. «Վերջերս հայկական մի շարք ԶԼՄ-ներում շրջանառվեցին լուրեր՝ կապված իրանցի բարձրաստիճան ռազմական պաշտոնյաների՝ Հայաստան կատարած այցի և դրա նպատակների, այնուհետև՝ Իրանում 160 հայ զինծառայողների ներկայության վերաբերյալ:

Երևանում ԻԻՀ դեսպանությունը հայտարարել է, որ Իրանում 160 հայ զինվորների գտնվելու մասին հայկական ԶԼՄ-ներում շրջանառվող լուրերը չեն համապատասխանում իրականությանը:

Սկզբում, հայկական լրատվամիջոցներից մեկը, վկայակոչելով Երևանի Զվարթնոց օդանավակայանի իր աղբյուրները, հաղորդեց, որ իրանցի 10 ռազմական բարձրաստիճան պաշտոնյաներ այցելել են Հայաստան: Այնուհետև մեկ այլ լրատվամիջոց, հղում կատարելով իր աղբյուրներին, հայտնեց, որ իրանցի ռազմական պաշտոնյաներն առաջարկել են իրանական զորքերը տեղակայել Հայաստանում, սակայն ՀՀ վարչապետի պաշտոնակատար Նիկոլ Փաշինյանը չի ընդունել առաջարկը: Ավելի ուշ հրապարակվեց Իրանում 160 հայ զինծառայողների գտնվելու և նրանց վերադարձի համար Թեհրանի կողմից նախապայման առաջարկելու մասին լուրը, որը պաշտոնապես հերքվեց Երևանում Իրանի դեսպանության կողմից: Բայց կարևորն այն է, թե ո՞րն է այս լուրերի հրապարակման նպատակը:

Հակառակ Իրանի ռազմական պաշտոնյաների՝ Հայաստան այցի մասին լուրերին, որոնք կարելի է նորմալ համարել՝ հաշվի առնելով երկու երկրների հարաբերությունները, հաջորդ երկու նորությունները այլ նպատակներ ունեն: Դրանք կապված են տարածաշրջանում աշխարհագրական սահմանների փոփոխության և «Զանգեզուրի միջանցքի» կապակցությամբ Իրանի վերջին դիրքորոշման հետ:

Հայաստանում ռազմական ուժ տեղակայելու՝ Իրանի առաջարկի վերաբերյալ լուրերի հիմնական լսարանը Ադրբեջանում է, հատկապես՝ այդ երկրի անջատողական և պանթյուրքական հոսանքները: Նման լուրերի նպատակն է Ադրբեջանում հակաիրանական մթնոլորտ հրահրել:

Իսկ «Ենի մասավաթ» թերթը, որը ոչ պաշտոնապես ներկայացնում է Ադրբեջանի նախագահի դիրքորոշումները, վերահրապարակելով հայկական ԶԼՄ-ներում հրապարակված լուրերը, կարծես արտացոլում է «Ատլաս» հետազոտական ​​կենտրոնի ղեկավար Իլխան Շահինօղլուի և քաղաքական փորձագետ Չիրչին Միրզա Բիգլուի տեսակետերը և հղում անելով վերջիններիս, Ադրբեջանին կոչ է անում խզել բոլոր հարաբերություններն Իրանի հետ:

Սակայն որևէ մեկը տրամաբանական պատասխան չունի այն հարցին, թե ինչպես կարող է Իրանը տեղակայել իր ռազմական ուժերը տարածաշրջանում՝ հաշվի առնելով ռուս սահմանապահների կողմից իրանա-հայկական սահմանի վերահսկողությունը:

Հայ զինվորների՝ Իրանում գտնվելու մասին լուրն, ի տարբերություն նախորդ լուրերի, թիրախավորում է Հայաստանի հասարակական կարծիքը՝ նպատակ ունենալով վնասել Իրան-Հայաստան հարաբերություններին՝ շահարկելով Ղարաբաղյան վերջին պատերազմում ռազմագերիների և անհետ կորածների զգայուն հարցը:

Հաշվի առնելով ասվածը, Ադրբեջանում և Հայաստանում հակաիրանական տրամադրությունների հրահրումը կարող է ունենալ մեկ ընդհանուր նպատակ՝ ազդել Իրանի դիրքորոշման վրա՝ կապված «Զանգեզուրի միջանցքի» և հարևանների հետ պաշտոնական սահմանների վերաբերյալ դիրքորոշման վրա: Այս դիրքորոշումը վերջին օրերին բազմիցս ընդգծվել է Իրանի տարբեր պաշտոնյաների կողմից: