«Սա խոսակցություն է Հայաստանի ինքնիշխանության աստիճանի մասին». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է․ «ԱՄՆ Միջազգային զարգացման գործակալությունը հայտարարում է Հայաստանի հետ գործակցության 2020-25 հնգամյա ռազմավարության երկու առանցքային ուղղությունները՝ ժողովրդավարական անցման շարունակության աջակցություն և տնտեսական արդիականացման միջոցով Հայաստանի հանրության տնտեսական անվտանգության աստիճանի բարձրացում:

Այս թիրախների բազմակողմ և բազմաշերտ կարևորության մասին խոսելը թվում է ավելորդ: Ըստ էության՝ սա խոսակցություն է Հայաստանի ինքնիշխանության աստիճանի մասին: Եվ բնականաբար, սա բարեգործության մասին խոսակցություն չէ, այլ քաղաքական և ընդհուպ ռազմա-քաղաքական շահի, և ըստ այդմ՝ հույժ կարևոր է, որպեսզի Հայաստանում գտնվի այդ շահի վրա համատեղ աշխատանքի պատրաստ գործընկերային պատասխանատու սուբյեկտների շրջանակ:

Այդ շրջանակը չպետք է և չի կարող սահմանափակվել միայն կառավարության շրջանակով՝ ով էլ լինի կառավարության ղեկին: Միևնույն ժամանակ, շատ կարևոր է գործընկերային շրջանակի «բծախնդիր» ընտրությունը, որպեսզի հնգամյա ռազմավարությունն իսկապես ծառայի Հայաստանի հնարավորությունների համակարգային և խորքային դիվերսիֆիկացիային ու ինքնիշխանության բարձրացմանը, այլ ոչ թե մարդիկ մի ձեռքով առնչվեն դրան ուղղված լիցքերին, մյուսով դրանք մատնեն «եվրասիական հողանցման»»: