«Լինում են, չեն լինում, երեք ախպեր են լինում․․․»․ Վաչագան Սարգսյան

«Այբբենարան»-ի հեղինակ Վաչագան Սարգսյանը ֆեյսբուքյան իր էջում գրել է. «Լինում են, չեն լինում, երեք ախպեր են լինում՝ մի Երջանիկ Ապագա, մի Գլուխ արդուկող Ներկա, մի Եղել է, Չի Եղել Անցյալ:
Սրանք մի օր վեր են կենում գնում Աստծու մոտ, որ իմանան, թե իրենցից ով է անդրանիկ զավակը, որ ժառանգի Արցախի հարցը լուծելու փառքն ու հարակից շրջանները: Շատ են գնում, թե՝ քիչ, մեկ էլ տեսնում են, որ մոռացել են, թե իրենք ով են: Երջանիկ Ապագային թվում է, թե ինքը Գլուխ արդուկող Ներկան է, Ներկային թվում է, թե ինքը Նախկին է: Իսկ Եղել է, Չի Եղել Անցյալին թվում է, թե ինքն է Երջանիկ Ապագան: Խառնվում են իրար, չեն իմանում՝ ինչ անեն:
Քոռ ու փոշման հետ են գալիս, տեսնում են Հայաստանը չկա՝ գնացել է իրենց ման գալու»։