«Հայաստան» դաշինքը դատի է տվել ԿԸՀ-ին՝ պահանջելով նախազգուշացում կիրառել ՔՊ-ի նկատմամբ

«Հայաստան» դաշինքը դատի է տվել ՀՀ կենտրոնական ընտրական հանձնաժողովին: Այս մասին տեղեկանում ենք Դատական տեղեկատվական համակարգից:

Հայցը ներկայացվել է հունիսի 21-ին և մակագրվել Վարչական դատարանի դատավոր Կարեն Զարիկյանին:

Դաշինքը պահանջում է ԿԸՀ հունիսի 19-ին կայացրած որոշումը մասնակիորեն անվավեր ճանաչել և «Քաղաքացիական պայմանագիր» կուսակցության նկատմամբ նախազգուշացում կիրառել:

Նշենք, որ «Հայաստան» դաշինքը մինչ ընտրությունները դիմել էր ԿԸՀ՝ նշելով, որ ՀՀ վարչապետի աշխատակազմի հասարակայնության հետ կապերի վարչության աշխատակիցները, ոստիկանության աշխատակիցները քաղաքացիական և ծառայողական համազգեստով օգտագործվում են քարոզարշավի համար: Բացի այդ, նշվել էր, որ ՔՊ պատգամավորի թեկնածուներն օգտվում են ՀՀ վարչապետի աշխատակազմին կցված մեքենաներից: Նրանք դիմել էին նաև հունիսի 19-ին Նիկոլ Փաշինյանի ֆեյսբուքյան ուղիղ եթերի հարցով՝ որպես լռության օրվա խախտում: Ինչպես նաև Վարդենիսի նյարդահոգեբանական տուն-ինտերնատի աշխատակիցների՝ հավաքին մասնակցելու հարցով: ԿԸՀ-ն կա՛մ մերժել, կա՛մ կարճել էր վերոնշյալ կետերով դիմումը: