«Խնդրում եմ, մեզ տուն ուղարկեք». հայ ռազմագերին՝ Բաքվի դատարանին

Բաքվի ծանր հանցագործությունների դատարանում շարունակվում է 14 հայ ռազմագերիների դեմ քրեական գործով դատավարությունը։ Նրանք, ըստ ադրբեջանական լրատվամիջոցների, մեղադրվում են «ահաբեկչության և այլ հանցավոր գործողությունների» մեջ։
Նույն լրատվամիջոցների հաղորդմամբ՝ այսօրվա նիստի ժամանակ ռազմագերիներից մեկի, անձնական տվյալները պարզելիս, հայտնի է դարձել, որ 1996 թվականին ծնված Ալբերտ Պետրոսյանը, ծնունդով գյումրեցի է, ունի երկքաղաքացիություն: «2013 թվականից ապրում եմ Մոսկվայում: Ես Հայաստանի և Ռուսաստանի քաղաքացի եմ», - ասել է Պետրոսյանը:
Դատավորի հարցին, թե արդյոք նրանք որևէ միջնորդություն ունե՞ն գործի վերաբերյալ, Վլադիմիր Հակոբյանը պատասխանել է. «Խնդրում եմ, մեզ տուն ուղարկեք»։
Դատավորն ասել է, որ եթե դատավարության ընթացքում հայ ռազմագերիներին առաջադրված մեղադրանքը հաստատվի, նրանք կարող են դատապարտվել 14-ից 20 տարի ժամկետով կամ ցմահ ազատազրկմամբ:
Ռազմագերիները մասամբ ընդունել են իրենց ներկայացված մեղադրանքը։