«Գոնե տարիքս հարգի. ԱԺ նախագահին կարող ես չհարգել». Արթուր Թովմասյան

Արցախի Հանրապետության Սահմանադրության 114-րդ հոդվածի 2-րդ մասի և «Ազգային ժողովի կանոնակարգ» օրենքի 37-րդ հոդվածի 1-ին մասի համաձայն Արցախի Հանրապետության նախագահի նախաձեռնությամբ գումարվել է ԱՀ ԱԺ արտահերթ նիստ՝ նախաձեռնողի սահմանած հետևյալ օրակարգով.

«Ռազմական դրության իրավական ռեժիմի մասին» օրենքում լրացումներ և փոփոխություն կատարելու մասին» և «Քրեական օրենսգրքում լրացումներ կատարելու մասին» օրենքների նախագծերի փաթեթ»:

«Սեփականության իրավունքից են խոսում, երբ մեր հայրենիքի 75 տոկոսն Ադրբեջանը զավթել է. դե եկեք այդ 75 տոկոսի սեփականության իրավունքը պաշտպանենք»,- ասաց խորհրդարանի խոսնակ Արթուր Թովմասյանը: «Մարսից չենք իջել. 25 հազարի հարց ա ու մի քանի տասնյակ մարդու: Քվեարկությամբ կտեսնեմ՝ մի քանի տասնյակի իրավունքնե՞րն ենք պաշտպանում, թե՞ մի քանի տասնյակ հազարի»,- շարունակեց նա: Ընդդիմադիրները դահլիճից արձագանքեցին, որ պետք չէ խեղաթյուրել մտքերը: «Գոնե տարիքս հարգի, ԱԺ նախագահին կարող ես չհարգել»,- արձագանքեց Թովմասյանը՝ դիմելով երիտասարդ պատգամավորին:

«Ռազմական դրության իրավական ռեժիմի մասին» օրենքում առաջարկվող փոփոխությամբ ռազմական դրությամբ պայմանավորված խնդիրները լուծելու նպատակով կարող է օգտագործվել ֆիզիկական և իրավաբանական անձանց գույքը (բացառությամբ դրամական միջոցների, արժեթղթերի և գույքային իրավունքների), եթե Արցախի Հանրապետության տիրապետության ներքո գտնվող համապատասխան գույքը բավարար չէ: Ընդ որում, գույքի անբավարարությունը գնահատվում է՝ նաև հաշվի առնելով կոնկրետ իրադրությունը, խնդրի հրատապությունը, գույքի գտնվելու վայրը և էական նշանակություն ունեցող այլ հանգամանքներ:
«Քրեական օրենսգրքում լրացումներ կատարելու մասին» օրենքի նախագծով ռազմական դրության իրավական ռեժիմի ընթացքում գործող միջոցառումները և ժամանակավոր սահմանափակումները խախտելու ու ռազմական դրության իրավական ռեժիմն ապահովող մարմինների և ուժերի գործունեությունը խոչընդոտելու համար պատասխանատվություն է սահմանվում՝ ազատազրկման ու տուգանքի տեսքով: Այս մասին տեղեկանում ենք ԱՀ ԱԺ ֆեյսբուքյան էջից: