«Քաղաքական սադոմազոխիզմի նոր տարբերակ է՝ «Կրեմլի պատվեր», «Կրեմլի ցուցում», «Կրեմլի խաղ»»․ Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Ինձ թվում է Հայաստանում քաղաքական սադոմազոխիզմի նոր տարբերակ է՝ «Կրեմլի պատվեր», «Կրեմլի ցուցում», «Կրեմլի խաղ»: Դեռևս դրանից դուրս է դիտվում շոգը, բայց գուցե միայն առայժմ:
Թվում է, որ մարդիկ ու գործիչներ կան, որոնք առանձնահատուկ բավականություն են ստանում իրենց իսկ հռետորաբանությունից, և, իհարկե, կան նաև դրա ունկնդրումից բավականություն ստացողներ: Լավ, հասկանալի է, Հայաստանում կա ռուսական գերազդեցության բավականին լուրջ խնդիր, բայց բոլորովին լուրջ չէ, երբ որևէ սուբյեկտ իրենից բացի գործնականում մնացյալ ամեն ինչ հռչակում է «Կրեմլի պատվեր» կամ «Կրեմլի խաղ»:
Մի կողմից ձևավորվում է համատարած «պատվերի» մտայնություն, մյուս կողմից իբրև թե խոսվում է դրանից ազատագրվելու անհրաժեշտության մասին: Այն դեպքում, երբ հանրագումարում այդ կարգի հռետորաբանությունը ընդամենը ավելի ու ավելի արգելափակում է հանրային մտածողության ներուժը, խորացնելով «Կրեմլի դեմ խաղ չլինելու» համոզում: Չգիտեմ, բոլորն են անում դա «էֆեկտը» լավ պատկերացնելով, թե ոչ, բայց որ մի որոշ մասը անում է հենց այդպես, գրեթե չունեմ կասկած»: