«Առաջիկա օրերին Կառավարության կողմից կհաստատվի բնակարանային ծրագիրը»․ Արտակ Բեգլարյան

«Առաջիկա օրերին Կառավարության կողմից կհաստատվի պատերազմի հետևանքով բնակարանային խնդիրներ ունեցած անձանց, ընտանիքների բնակարանային խնդրի լուծման ծրագիրը»,- այսօր՝ մամուլի ասուլիսի ժամանակ, հայտարարեց Արցախի պետական նախարար Արտակ Բեգլարյանը։

«Ծրագրին կից լինելու է ժամանակացույց, որ կոնկրետ ժամկետներով պարզ լինի՝ որ գործողությունը կամ միջոցառումը, որ մարմինն ինչքան ժամկետում է իրականացնում»,- նշեց նա։

Բեգլարյանն ասաց, որ այս ամիսների ընթացքում արդեն որոշակի աշխատանքներ կատարվել են, տեղահանված տարբեր ընտանիքներ արդեն ժամանակավոր կամ մշտական քիչ թե շատ տեղավորվել են տարբեր տներում, վերանորոգման աշխատանքները սկսվել են։

«Շինարարական աշխատանքները և երկրորդական շուկայից բնակարանների ու տների ձեռքբերումն առաջիկա շաբաթներին արդեն ակտիվ փուլ են մտնելու։ Ըստ հերթացուցակի առաջնահերթությունների և ըստ բնակավայրերի՝ կկարողանանք մի քանի շաբաթից ավելի հստակ ասել, թե ով ինչքան ժամանակում կապահովվի բնակարանով»,- հավելեց նա։