«Խեղկատակությունների շքերթը շարունակվում է». Հայկ Մարտիրոսյան

148

Հինգշաբթի, 01 հուլիսի, 2021 թ., 13:48

ԱԺԲ անդամ, քաղաքագետ Հայկ Մարտիրոսյանը ֆեյսբուքյան իր էջում գրել է. «Պետական մակարդակով դավաճանական դեբիլությունը շարունակվում է:

Նյու Ջերզի նահանգը ճանաչել է Արցախի անկախությունը: Արցախի, այսպես կոչված, ԱԳՆ-ն էլ ուրախ և հպարտ հայտարարում է այդ մասին:

Նախ՝ Նյու Ջրզին թեև մեծ, բայց ընդամենն ամերիկյան նահանգ է, որ որևէ միջազգային գործառույթ չունի: ԱՄՆ որևէ նահանգ ո՛չ միջազգային հարաբերությունների սուբյեկտ է և ո՛չ էլ արտաքին քաղաքականություն վարելու որևէ գործառույթ կամ լիազորություն ունի:

Հետևաբար այս ճանաչումն էլ բացի խորհրդանշական լինելուց՝ ոչ մի արժեք չունի:

Ապա՝ ո՞ր Արցախի անկախությունն են ճանաչել: Այն, որ մտածում էին, որ եթե կեղծանկախ լինի, ապա Ադրբեջանը չի հարձակվի՞: Այդ Արցախն այլևս չկա: Այն լիովին գտնվում է ռուս-ադրբեջանական օկուպացիայի տակ:

Երրորդ՝ դեռ շարունակվում է Արցախն Ադրբեջանի մաս փաստացի ճանաչած լինելու և հետո դրան իբր անկախություն տալու դավաճանական գործընթացը:

Արցախը, համաձայն միջազգային փաստաթղթերի և օրենքների՝ Հայաստանի Հանրապետության տարածք է՝ դեռևս 1920-ից սկսած:

Եվ վերջին՝ որքա՞ն ջանք, միջոց և ֆինանս է ծախսել Ամերիկայի հայկական լոբբիստական կազմակերպություններից մեկը, որպեսզի այս ապուշությունն իրականանա: Չէ՞ր ցանկանա արդյոք այդ գումարները ծախսել Հայաստանում, իսկ ժամանակն ու գործի դրված կապերի հսկա շրջանակը՝ ծառայեցնել Հայաստանի շահերին: Խեղկատակությունների շքերթը շարունակվում է:
Ու շարունակվելու է՝ քանի դեռ իշխանության են թշնամիները»: