«Անհասկանալի է, թե ինչու այս փաստաթուղթը չընդունեց հեռացող խորհրդարանը»․ Թագուհի Թովմասյան

Անկախ պատգամավորներ Թագուհի Թովմասյանը, Աննա Գրիգորյանն և Սոֆյա Հովսեփյանը նախաձեռնել են ԱԺ հայտարարության նախագիծ՝ «Ադրբեջանի կողմից Արցախի դեմ ուժի կիրառման և ղարաբաղյան հակամարտության ներկա փուլի մասին»:

«Այս հայտարարությունը այնքանով է կարևոր, որ Հայաստանի Հանրապետությունը Արցախի ապագային առնչվող որևէ փաստաթուղթ ինքնուրույն չի հռչակել, որ գոնե ինքն իր համար հասկանա՝ ինչ է Արցախը, ինչ նպատակներ ունի Արցախի ապագայի մասով»,- այսօր լրագրողների հետ ճեպազրույցում ասաց Թագուհի Թովմասյանը:

«Մենք ուրվագծել ենք որոշակի բաներ, որոշակի թեզեր, մտքեր և ճակատագրական ձևակերպումներ, որոնք պետք է անպայման տեղ գտնեն ՀՀ արտաքին քաղաքական օրակարգում»,- նշեց նա:

Թովմասյանի խոսքով՝ հայտարարության նախագիծը ներառված է եղել հունիսի 15-ի քառօրյա նիստերի օրակարգում։

«Այդ օրերին մարդիկ զբաղված էին քարոզարշավով, քվորում չապահովվեց և հնարավորություն չունեցանք այս հայտարարության նախագիծը ընդունել»,- ասաց նա։

«Երբ որ «Իմ քայլը» խմբակցությունը նախաձեռնել էր արտահերթ նստաշրջան, որն ավարտվեց այսօր, մենք փորձեցինք ներգրավել օրակարգում նաև այս հարցը, սակայն ստացանք մերժում․․․ Անհասկանալի է, թե ինչու այս փաստաթուղթը չընդունվեց հեռացող խորհրդարանի կողմից»,- հավելեց պատգամավորը։