Էրդողանը նորից դատի է տվել ընդդիմադիր առաջնորդին

Թուրքիայի նախագահ Ռեջեփ Էրդողանն ընդդիմադիր «Ժողովրդահանրապետական» կուսակցության (CHP-ԺՀԿ) առաջնորդ Քեմալ Քըլըչդարօղլուի դեմ նոր դատական հայց է ներկայացրել։

Թուրքական մամուլում տեղ գտած տեղեկության համաձայն, Էրդողանը Քըլըչդարօղլուից 500.000 թուրքական լիրա (շուրջ 57․586 ԱՄՆ դոլար) է պահանջում՝ որպես բարոյական վնասի փոխհատուցում, տեղեկացնում է Ermenihaber-ը:
Պատճառն այն է, որ նախօրեին Քըլըչդարօղլուն մեջլիսում ունեցած ելույթում Էրդողանի հասցեին վիրավորական արտահայտություններ էր հնչեցրել:

Միաժամանակ հայցում ընդգծվել է, որ ԺՀԿ առաջնորդը խախտել է Էրդողանի անձնական իրավունքները:

Հիշեցնենք, որ վերջին տասնամյակում Քեմալ Քըլըչդարօղլուի դեմ Էրդողանի անունից ռեկորդային թվով դատական հայցեր են ներկայացվել, որոնց ճնշող մեծամասնությունը ավարտվել է հօգուտ Էրդողանի։

Արդյունքում Քըլըչդարօղլուն թուրքական տարբեր դատարանների որոշումներով պարտավորվել է միլիոնավոր լիրաների փոխատուցում վճարել Էրդողանին՝ վերջինիս վերաբերյալ իր ելույթներում հնչեցրած գրեթե բոլոր բացասական կամ քննադատական արտահայտությունների համար։