««Հայաստան» դաշինքը հնարավորություններ ուներ ընտրություններում հաղթելու, որը չօգտագործեց». Ոսկան Սարգսյան

Լրագրող Ոսկան Սարգսյանը ֆեյսբուքյան իր էջում գրել է. «Ինչո՞ւ Ռոբերտ Քոչարյանը չհաղթեց ընտրություններում
3 ամիս առաջ գրել եմ՝ Նիկոլ Փաշինյանի հետ ընտրությունների գնալը նման է սատանի մայլում քնդրբազ պարելուն․ Նիկոլ Փաշինյանը վերջին 25 տարում վարպետորեն տիրապետում է մանիպուլյացիաների, այլոց մրոտելու արհեստին և նորից ներկաներ-նախկին թալանչիներ քարոզչական հին ձայնասկառավակն է պտտելու, օգտագործելու է վարչական բոլոր ռեսուրսները։ Ինչն էլ եղավ։ Իրականում Ռոբերտ Քոչարյանի գլխավորած «Հայաստան» դաշինքն իրական հնարավորություններ ուներ ընտրություններում հաղթելու, որը չօգտագործեց։ Ենթադրում եմ, որ այն չօգտագործեց 3 պատճառով՝ 1․ դրսի հզոր կենտրոնը, որն այսօր փաստացի ղեկավարում է Հայաստանը, որի հետ սերտ կապված է Քոչարյանը, դա Քոչարյանին թույլ չտվեց։

2․ Ռ․ Քոչարյանը առանձնապես շահագրգիռ չէր իշխանություն վերցնելու, քանի որ նոյեմբերի 9-ի խայտառակ հայտարարության մեջ գրված է կոմունիկացիաներ բացելու մասին, Արցախի հերոս Քոչարյանը չէր կարող Հայաստանի տարածքով կոմունիկացիաներ կամ միջանցքներ տալ, սահմանազատման անվան տակ Հայաստանից տարածքային զիջումներ անել Ադրբեջանին։

3․ Ռ․ Քոչարյանը և նրա քարոզչական թիմը ավելորդ ինքնավստահ էին, չէին պատկերացնում մարզերի ընտրողներին, նրանց հետ քարոզչական աշխատանքի ձևերը։ Հնարավոր է՝ այս 3 գործոնները միասին, կամ դրանցից մի քանիսն են եղել ընտրություններում Քոչարյանի պարտության պատճառը։ Դեռևս մարտ մասին հայտնի էր, որ հունիսի ն ԱԺ արտահերթ ընտրություններ են լինելու, շուրջ 3 ամիս ժամանակ կար դրանց նախապատրաստվելու։ Ֆինանսական, քարոզչական, կադրային հսկայական ռեսուրսներ ունեցող Ռոբերտ Քոչարյանը պոպուլիստ Նիկոլ Փաշինյանին կարող էր հաղթել ոչ թե ընտրություններում իր գլխավորած դաշինքի քվեներն ավելացնելով, այլ՝ Նիկոլ Փաշինյանի ձայները նվազեցնելու միջոցով։ Դրա համար կարող էր մի փոքրիկ կուսակցություն ստեղծել (դրանք շատ էին հունիսի 20-ի ընտրությունների քվեաթերթիկներում), որի ղեկավար կլիներ սուպերպոպուլիստ մեկը, ով Նիկոլ Փաշինյանի չագուչի փոխարեն հրապարակում մեծ սուր կբարձրացներ, դրանով ընտրազանգվածին բոլոր անօրեններին պատժելու խոստում կտար, բայց իր ելույթներում ավելի շատ կնշեր Նիկոլ Փաշինյանի իշխանության ահավոր սխալները և բացթողումները, սենսացիոն բացահայտումներով կգցեր դրա վարկանիշը։ Նրա քարոզչության համար որոշակի ծախսեր կատարելու, այդ թեկնածուին լավ խաղարկելու դեպքում նա ի վիճակի էր Նիկոլ Փաշինյանի ընտրազանգվածից 10-20 տոկոս տանել, ինչն անհնար կդարձներ Փաշինյանի իշխանության վերարտադրումը։
«Հայաստան» և «Պատիվ ունեմ» դաշինքները, ընտրությունների արդյունքները վիճարկելով, դիմել են ՍԴ։ Ընտրախախտումները մեծ են եղել, սակայն չեմ հավատում, որ ՍԴ- ն կչեղարկի ընտրությունների արդյունքները։ Նիկոլ Փաշինյանի իշխանությունը շարունակելու է իր ապիկար կառավարումը, զիջումներ է անելու Ադրբեջանին և Թուրքիային, մինչև որ դրսի կենտրոնները համարեն, որ նա իր գործն արել է և կարող է իշխանությունից հեռանալ»: