Արամ Վարդևանյանը՝ Արմեն Չարչյանի առողջական վիճակի մասին

«Այստեղ կա քաղաքական բաղադրիչ և դրանից ելնելով՝ ունենք այն պատկերը, ինչ ունենք»,- այսօր՝ «Հայաստան» դաշինքի պատգամավորի թեկնածու, բժիշկ Արմեն Չարչյանի կալանավորման որոշման բողոքարկման դատական նիստից առաջ՝ դատարանի մոտ լրագրողների հետ զրույցում, ասաց Չարչյանի պաշտպան Արամ Վարդևանյանը։
«Հեղինակություն վայելող տասը հոգի ասում են, որ պրոֆեսոր Չարչյանը չի խոչընդոտի գործի քննությանը, ի դեպ, մենք պատրաստ էինք, որ տասն էլ լինեին երաշխավոր՝ իրենցից յուրաքանչյուրը 5 հարյուր հազար դրամ վճարելու պատրաստակամություն ուներ, բայց դա բավարար չէր։ Դա նշանակում է, որ պետք է ուղղակի պրոֆեսոր Չարչյանը կալանավորված լինի»,- հայտարարեց Վարդևանյանը։
Անդրադառնալով Չարչյանի առողջական վիճակին, պաշտպանն ասաց, որ նա դեռ գտնվում է հիվանդանոցում։
«Սրտի վերաբերյալ բժշկական միջամտություն էր եղել՝ ստուգողական բժշկական գործողություններ էին կատարել»,- նշեց նա։
«Եթե նույնիսկ դատարանը վերացնի կալանավորումը, ապա դրական ելքի դեպքում էլ այս պահին Չարչյանը չի կարող դուրս գրվել հիվանդանոցից»,- հավելեց Վարդևանյանը։