Երկուշաբթի, 23 փետրվարի, 2026 թ.
|
Ստեփանակերտում`   +5 °C

«Գերիների կյանքերի շուրջ տեղի է ունենում առևտուր, որին հայկական կողմը համաձայնվել է». Արման Աբովյան

«Գերիների կյանքերի շուրջ տեղի է ունենում առևտուր, որին հայկական կողմը համաձայնվել է». Արման Աբովյան
220
Երեքշաբթի, 06 հուլիսի, 2021 թ., 21:24

ԲՀԿ-ական Արման Աբովյանը ֆեյսբուքյան իր էջում գրում է. «Քանզի, ինչպես տեսնում եմ տեղեկատվական դաշտում գերակայում են հիմնականում ակնթարթային և արհեստականորեն գեներացված «հրատապ» անիմաստ տեղեկությունները՝ հարկ եմ համարում պարզապես հիշեցնել, թե ինչ է պատահել մեզ՝ բոլորիս հետ։
Հասկանում եմ, որ կարող է մի փոքր գրգռեմ ոմանց հոգեկան անդորրը, բայց դե, այնուամենայնիվ։
1․ Մեր հայրենիքի մի մասը՝ Արցախի Հանրապետության 75%-ը, դավադրաբար հանձնվել է թշնամուն։
Կրկնեմ՝ մեր հայրենիքի մի մասը գտնվում է թուրք-ադրբեջանցիների օկուպացիայի ներքո։
2․ Զոհվել են հազարավոր հայեր, թուրքերի և ադրբեջանցիների կողմից զանգվածաբար ռմբակոծվում էին հայկական խաղաղ քաղաքները։ Թուրք-ադրբեջանական վիժվածքները տեսախցիկների առջև սպանում, գնդակահարում, գլխատում էին հայերին։
3․ Ադրբեջանը պատերազմից հետո գերեվարել է մի քանի տասնյակ հայերի, ընդ որում մի քանի զինվոր գերեվարվել են Հայաստանի Հանրապետության սուվերեն տարածքից։ Հիմա մեր գերիների կյանքերի շուրջ տեղի է ունենում առևտուր, որին հայկական կողմը համաձայնվել է։ Կրկնեմ՝ հայկական կողմը համաձայնվել է մեր գերիների մասով ադրբեջանական առևտրի սխեմային։
4․ Ադրբեջանական կողմը ներխուժել է Հայաստանի Հանրապետության տարածք և ամրապնդվում է արդեն Հայաստանի տարածքում՝ զուգահեռ պարբերաբար ահաբեկելով խաղաղ բնակիչներին։
5․ Ադրբեջանական զինված ուժերը փաստացի վերահսկում են Հայաստանի հարավային՝ ստրատեգիկ նշանակություն ունեցող Սյունիքով անցնող ճանապարհի մի մասը։
6․ Ադրբեջանական կողմը պնդում է, որ պետք է շուտափույթ ստանա Հայաստանից ելք դեպի Նախիջևան («միջանցք» կամ ճանապարհ՝ կարևոր չի այս պարագայում)։ Հայաստանի հին/նորընտիր իշխանությունը համաձայն է, նույնիսկ ավելի քան համաձայն է այդ նախագիծը շուտափույթ իրականացնելու։
7․ Ադրբեջանը նաև պնդում է, որ պետք է շատ շուտ անցկացվի դելիմիտացիա և դեմարկացիա, դրանով հաստատի վերահսկողությունը՝ արդեն դեպի Վրաստան տանող ստրատեգիկ նշանակություն ունեցող ճանապարհի վրա։
Եվ այստեղ նույնպես հայաստանյան իշխանությունները սկզբունքային առարկություններ չունեն այդ նախագծերին։
8․ Նախատեսվում է միջնաժամկետ ապագայում դիվանագիտական հարաբերություններ հաստատել Թուրքիայի և Ադրբեջանի հետ, դրանով վերջնականապես «կփակվեն» Հայոց ցեղասպանության միջազգային ճանաչման և Արցախի Հանրապետության անկախության հարցերը։...
Սա ընդամենը հիշեցման կարգով։
Ու, հա՛, հանկարծ չմոռանաք՝ Ապագա Կա՛...վայելե՛ք»: