«Միջնորդում եմ՝ որպես վկա հրավիրել ՀՀ նախագահին». Հրայր Թովմասյան

ՍԴ դատավոր Հրայր Թովմասյանն այսօրվա նիստի ժամանակ միջնորդեց, որ ԱԺ արտահերթ ընտրությունների արդյունքները վիճարկող դիմումների քննությանը վկայի կարգավիճակով հրավիրվի նաև ՀՀ նախագահ Արմեն Սարգսյանը:

«Դիմումատուներն իրենց դիմումներում մատնանշել են որոշակի փաստական հանգամանքներ, որոնց պատասխանողները չեն կարող պատասխանել, որովհետև իրենց իրավասությունից դուրս է: Առաջինը վերաբերում է Հանրապետության նախագահին, թե ի՞նչ պարագայում, ի՞նչ պայմաններում է որոշել ընտրության օրը նշանակել հունիսի 20-ին: Այդ հարցի պատասխանը ներկաները չեն կարող տալ, բայց բոլոր դիմումներում այդ հարցը բարձրացված է: Ես միջնորդում եմ՝ սույն գործով որպես վկա հրավիրել ՀՀ նախագահին, որպեսզի այս հարցերի պատասխանը տա: Հարցին պետք է այս փուլում անդրադառնալ, որովհետև մենք ունենք սահմանված խիստ ժամկետներ (ինձ հայտնի չէ նախագահի գրաֆիկը), որպեսզի այս հարցերը պարզաբանվեն, և մենք կարողանանք գնալ առաջ»,- ասաց Թովմասյանը:

ՍԴ դատավոր Վահե Գրիգորյանն էլ իր հերթին ընդգծեց, որ կարիք չի տեսնում նախագահին ՍԴ կանչելու. բավական է միայն նրան գրություն ուղարկելը:

Սահմանադրական դատարանի կազմը որոշեց այս հարցը քննարկել խորհրդակցական ձևաչափով: