«Այն պատգամավորը, որը դեմ կքվեարկի Արցախի հարցով հանձնաժողովի ստեղծմանը, չի կարևորում Արցախի խնդիրների լուծումը». Մամիջանյան

«Ցանկացած պատգամավոր, որը դեմ կքվեարկի Արցախի հարցերով մշտական հանձնաժողովի ստեղծմանը, չի կարևորում Արցախի խնդիրների մշտական, հետևողական լուծումը։ Հանձնաժողովը ցույց կտա, որ մեր երկիրը կանգնած է մեր հայրենիք Արցախի կողքին և պատրաստ է կիսել մեր հայրենիքի ցավը»։ Այս մասին այսօր ԱԺ-ում ասաց «Հայաստան» դաշինքի պատգամավոր Հայկ Մամիջանյանը՝ անդրադառնալով Վլադիմիր Վարդանյանի խոսքին, թե «Տրամաբանական չէ ՀՀ ԱԺ-ում Արցախի հարցով հանձնաժողով ստեղծելը»:

Ըստ Մամիջանյանի՝ նոր հանձնաժողովը կկարգավորի Ղարաբաղի հետ հարաբերությունների ամբողջ սպեկտրը ամենօրյա ձևաչափով, այդ թվում՝ նաև բանակցային գործընթացը։ «Բանակցողները պետք է հաշվետու լինեն ժողովրդի ընտրյալներին»,- ասաց պատգամավորը:

Նշենք, որ «Պատիվ ունեմ» և «Հայաստան» խմբակցություններն առաջարկում են ԱԺ-ում Արցախի հարցերով հանձնաժողով ստեղծել: