«Այսօրվա տեղի ունեցածը կարող է Կրեմլի և կապիտուլյանտ վերնախավի գծած սցենարների ընթացքը խափանել». Նիկա Բաբայան

«Կանադս» երաժշտության կենտրոնի հիմնադիր և գործադիր տնօրեն Նիկա Բաբայանը ֆեյսբուքյան իր էջում գրել է. «Այն պահից, երբ վախկոտ ՔՊ-ական ղեկավարությունն ԱԺ նիստերի դահլիճ օգնության կանչեց անվտանգության զգեստավորված աշխատակիցներին, նորընտիր պառլամենտը համարում եմ լուծարված։

Բռնապետության ուղին վերցրած Փաշինյանը պետք է իր վարչակազմի գոյության րոպեներն սկսի հաշվել։

Կա մի հանգամանք, որն ստիպում էր ժամանակ առ ժամանակ հետևել ԱԺ-ի աշխատանքին։

Որ ՔՊ-ական թիմը, մեղմ ասած, խղճուկ ու ողորմելի է, պարզ էր առաջին րոպեներից։

Ընդդիմադիր թիմն անհամեմատ ուժեղ է։

Բայց երեքն էլ Կրեմլի երդյալ ծառաներն են։

Սպասում էի այն պահին, երբ Մոսկվայի հանձնարարությամբ վարչապետը կառաջարկեր ԱԺ-ին վավերացնել անկլավների հանձնումը հարևանին և Ռուսաստանի հսկողությամբ դելիմիտացիայի ու դեմարկացիայի աշխատանքների շուտափույթ իրականացումը՝ ի օգուտ թշնամիներին։

Ինչ, ընդդիմությունը պետք է հրաժարվե՞ր կատարել Կրեմլի հրամանը:

Այ սա ուզում էի անպայման տեսնել ու լսել ԱԺ-ի դահլիճից։ Բայց այսօրվա տեղի ունեցածը, ամենայն հավանականությամբ, կարող է Կրեմլի և կապիտուլյանտ վերնախավի գծած սցենարների ընթացքը խափանել»։