«Ասում եք՝ Տավուշի մարզում ադրբեջանական հողեր կան». Ագնեսա Խամոյանը՝ ՔՊ-ական պատգամավորին

«Հայաստան» դաշինքի պատգամավոր Ագնեսա Խամոյանն այսօր ԱԺ-ում դիմեց Տարածքային կառավարման, ՏԻՄ, գյուղատնտեսության հանձնաժողովի նախագահի թեկնածու, ՔՊ-ական պատգամավոր Վահե Ղալումյանին. «Այս վերջին շրջանում Դուք շատ եք խոսում Տավուշում, այսպես կոչված, անկլավների մասին խոսելիս Դուք ասում եք՝ Տավուշի մարզում ադրբեջանական հողեր կան: Եթե խաղաղության պայմանագիր, կամ առհասարակ որևէ պայմանագիր չի կնքվելու Ադրբեջանի հետ, ինձ հետաքրքիր է՝ ինչու եք այդ բեռը վերցրել Ձեզ վրա. ի վերջո ի՞նչ հողերի մասին է խոսքը»,- հարցրեց Խամոյանը:

Ի պատասխան Ղալումյանն ասաց. «Արդեն երեք օր է՝ ինձ մի կերպ եմ զսպում, որ ԱԺ ամբիոնից Ձեր կողմից բարձրացված էդ հարցին չանդրադառնամ: Որքան էլ մեծ է գայթակղությունը այդ հարցին պատասխանելու, բայց, այնուամենայնիվ, կարծում եմ, որ այդ հարցը հրապարակային քննարկել հնարավոր չէ: Ուզում եմ ուղղակի ասել՝ Դուք իմ ասածը կիսատ եք ներկայացնում. ես չեմ նշել միայն Տավուշի ադրբեջանական հողերի մասին, ես նաև նշել եմ հայկական հողերի մասին, որոնք գտնվում են Ադրբեջանի վերահսկողության տակ»: