«Առնվազն զավեշտալի է ձեր չափից մեծ ինքնավստահությունը»․ Խամոյանը՝ Եղոյանին

Այսօր՝ ԱԺ նիստում, «Հայաստան» խմբակցության պատագամավոր Ագնեսա Խամոյանը, դիմելով Եվրոպական ինտեգրման հարցերի մշտական հանձնաժողովի նախագահի թեկնածու, ՔՊ-ական պատգամավոր Արման Եղոյանին, ասաց․ «Դուք ձեր խոսքում ասացիք, որ տարածաշրջանում իրավիճակը լարված է և ասում եք, որ յուղ չպետք է լցնենք կրակի վրա։ Նախորդ շրջանում ձեր իշխանության գործունեությունը, ըստ էության, յուղ չլցնելու գործունեություն է եղել, դուք բավականին կառուցողական էիք տրամադրված և, չնայած Ադրբեջանի իշխանությունների կոշտ հռետորաբանությանը, Նիկոլ Փաշինյանն ասում էր, որ Ալիևը կիրթ և կառուցողական է, հետևանքը մենք տեսանք։ Հիմա, երբ Ադրբեջանն ավելի է կոշտացրել իր դիրքորոշումը դուք ձեր խոսքում ևս մեկ անգամ ընդգծում եք, որ պետք է շարունակել կրակի վրա յուղ չլցնելու քաղաքականությունը և կարծում եք, որ դա արդյունավե՞տ է լինելու»։

Ի պատասխան Եղոյանն ասաց․ «Երբ ես ասում եմ կրակի վրա յուղ չլցնել, նկատի ունեմ շատ ավելի մեծ կրակներ, քան, ասենք, ինչ-որ Ալիև կարող է լինի, ես լուրջ կրակներից եմ խոսում, ոչ թե Ալիևի նման։ Ես գլոբալ աշխարհաքաղաքական կենտրոնների բախումից եմ խոսում, դուք թեման տանում, լոկալացնում եք»։

Արձագանքելով Եղոյանին՝ Խամոյանը ասաց․ «Պարո՛ն Եղոյան առնվազն զավեշտալի է ձեր այս չափից մեծ ինքնավստահությունը։ Էնպիսի տպավորություն է, կարծես նոյեմբերի 9-ի կապիտուլյացիոն ակտը ստորագրել է մեր թևում նստած որևէ պատգամավոր» ։