«Հայաստանում միաբևեռ քաղաքական համակարգ է ստեղծվել». Ստեփան Դանիելյան

Քաղաքագետ Ստեփան Դանիելյանը ֆեյսբուքյան իր էջում գրել է․ «Այսօր Հայաստանում, ըստ էության, միաբևեռ քաղաքական համակարգ է ստեղծվել, և այդ բևեռը չափազանց թույլ է, անկախ խորհրդարանում ունեցած մեծամասնության փաստից։
Միաբևեռ համակարգի պայմաններում մենք ունենք լուրջ խնդիրներ թե՛ արտաքին քաղաքականության մեջ, թե՛ ներքին։
Միաբևեռ համակարգն ամենափխրունն ու վտանգավորն է թե՛ միջազգային հարաբերություններում, թե՛ ներքաղաքական կյանքում։ Նման պայմաններում խախտվում է բալանսների հնարավորություններն։ Կամ իշխող ուժն է սկսում փլուզվել, իր մեջ բևեռների ստեղծման միջոցով կոմպենսացնելու աննորմալ վիճակը, կա՛մ նոր ուժ պետք է ի հայտ գա։
Մինչ հիմա երկրորդ բևեռ չի հաջողվել ստեղծել, որը հասկանա, թե ինչ պրոցեսներ են ընթանում մեր տարածաշրջանում (իսկ ընթանում են չափազանց լուրջ զարգացումներ), նաև ունենա հանրային վստահության պոտենցիալ։
Իշխող մեծամասնությունը գնալու է քայլերի, որի պատճառով հեղինակազրկվելու է և գուցե նաև ներքին փլուզման խնդրի առաջ կանգնի։
Նոր մտածողության վրա հիմնված միավորման պահանջը կենսական է, իսկ դեպքերը կարող են արագացված տեմպերով ընթանալ»: