«Հույս ունեին, որ ԱՄՆ զորքն իրենց փրկելու է․ նույն մտայնությունը, ինչ մենք ունեինք»․ Գայանե Աբրահամյան

ԱԺ նախկին պատգամավոր Գայանե Աբրահամյանը ֆեյսբուքյան իր էջում գրել է. «Աֆղանստանի օրինակը գուցե թվա շատ հեռու է մեզնից և սցենարը կիրառելի չէ, բայց նմանություններն անասելի շատ են, ցավոք, ու եթե հիմա էլ չլրջանանք, գոնե այլոց սխալներից դասեր չքաղենք, ամենասարսափելի սցենարն էլ հնարավոր է դառնալու (չնայած՝ մեր գլխին թափվածից անգամ դասեր չքաղեցինք...)։
Նախ՝ հեռու չենք, բացարձակ հեռու չենք՝ հաշվի առնելով Իրանի սահմանակցությունն ու Իրանի նկատմամբ թալիբների նկրտումները, որոնց շահերը որոշ հարցերում լիովին համընկնում են Թուրքիայի շահերի հետ, թուրքերը վաղուց ակտիվ գործողությունների են անցել ու բանակցում են թալիբների հետ։
Երկրորդ՝ առնվազն տասը տարի շարունակ այսպիսի սցենարի զարգացման միտումներն ակնհայտ էին, վստահաբար հնարավոր էր կանխատեսել նման վերջաբան, սակայն ի՞նչ էր անում աֆղանական իշխանությունը, ԱՅՈ՛, աներևակայելի չափերի հասնող ԿՈՌՈՒՊՑԻԱՅԻ մեջ թաղված գռփում էր ամերիկյան փողերը։
143 մլրդ-ից ավելի գումար է ներդրվել պաշտպանական ու կառավարման համակարգերի կառուցման ու զարգացման վրա, միայն 88 մլրդ դոլար հենց զինված ուժերի վրա (աղբյուրը՝ BBC), մինչդեռ զարգանում ու աճում էր բացառապես կոռուպցիան ու ներքաղաքական գզվռտոցը։
Երրորդ՝ հույս ունեին, որ ԱՄՆ զորքն իրենց փրկելու է, հո չե՞ն թողնի, որ կորցնեն պետությունը, նույն մտայնությունը, ինչ մենք ունեինք ոչ միայն այսօր, այլ նաև 100 տարի առաջ... կորցրին, կորցրինք։
Ուշքի գալու և լրջանալու ժամանակ այլևս ՉՈՒՆԵՆՔ»։