«Աֆղանստանից մեր քաղելիք դասը ո՞րը պետք է լինի»․ Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Լսում եմ Աֆղանստանի իրադարձություններից «դաս քաղելու» մասին հորդորները: Կներեք, բայց չեմ պատկերացնում՝ ախր մենք ի՞նչ դաս պիտի քաղենք Աֆղանստանից: Չէ՛, ընդհանրապես, իհարկե, դաս քաղել կարելի է անգամ տարվա եղանակների փոփոխությունից, բայց Աֆղանստանից մեր քաղելիք դասը ո՞րը պետք է լինի:
Այո՛, մենք պետք է ուշադիր, շատ ուշադիր, անթարթ հետևենք Աֆղանստանի շուրջ զարգացումներին, որովհետև դրանք մեր համար պարունակում են նորանոր ռիսկեր՝ մոտ ու հեռու: Մենք էդտեղ ունենք լուրջ անելիքներ, որոնցից մեկը, օրինակ, պետք է լինի թերևս Կատարի հետ հարաբերությունը հնարավորինս խորացնելը:
Բայց Աֆղանստանից քաղելիք դասը ո՞րն է: Որ պետք է վատ երկիր կառուցելու փոխարեն լա՞վը կառուցել, եթե ընդհանրացված ձևակերպենք: Այսինքն, էդ պարզ հարցում մեր դասերը մեզ բավարար չեն, կամ մինչ այդ եղած ուրիշ դասեր բավարար չեն, հիմա Աֆղանստանի՞ դասը պետք է բավարար լինի:
Այլապես, լրիվ, բացարձակապես, հիմնավորապես տարբեր էթնո-քաղաքական, աշխարհաքաղաքական հարթություններում գտնվող Հայաստանի ու Աֆղանստանի «միջև» դասը որ՞ն է, ի՞նչ իմաստ ունեն էդ «դաս քաղելու» արարողակարգային կոչերը»: