«Որևէ բան սխալ չի ասել․ գաղտագողի ստորագրած անձը, եթե կապիտուլյանտ չէ, ի՞նչ է»․ Վանեցյան

«Պարզվում է՝ իրենց համար հենց ամենամեծ վիրավորանքը կապիտուլյանտն է, միանշանակ՝ կապիտուլյացիոն բնույթի փաստաթուղթ գաղտագողի ստորագրած անձը, եթե կապիտուլյանտ չէ, ի՞նչ է»,- լրագրողների հետ ճեպազրույցի ընթացքում անդրադառնալով Նիկոլ Փաշինյանին ուղղված՝ Աննա Մկրտչյանի հարցին, այնուհետև նիստերի դահլիճում տեղի ունեցած ծեծկռտուքին, ասաց «Պատիվ ունեմ» խմբակցության ղեկավար Արթուր Վանեցյանը՝ հավելելով, որ իրենց պատգամավորը որևէ բան սխալ չի ասել։

«Յուրաքանչյուր պատգամավոր գործում է իր ոճով, Աննա Մկրտչյանը «Պատիվ ունեմ» խմբակցության պատգամավոր է և չի գործում անկախ: Մենք ինչ ասել ենք, բոլորը ուժի մեջ է, ոչինչ չի փոխվել: Այս իշխանությունները մեր երկիրը հասցրել են պարտության, տապալել են երկրի անվտանգային համակարգը, կոտրել են ազգի հաղթանակած ոգին և ուշ թե շուտ պատասխան են տալու դրա համար»,-նշեց Վանեցյանը։