«Փաշինյանի դավաճանական ռեժիմը փորձում է մեկնարկել Մեղրու միջանցքի ծրագիրը». ԱԺԲ

Ազգային-ժողովրդավարական բևեռի խորհուրդը հայտարարություն է տարածել. «Փորձում են կյանքի կոչել Մեղրու ռուս-թուրքական միջանցքի ծրագիրը
Ըստ մեզ հասած հավաստի տեղեկությունների, նախորդ օրը ՌԴ ԱԴԾ սահմանապահ զորքերի ստորաբաժանումները տեղակայվել են Ագարակի հատվածում արևմտյան (Նախիջևանի) ուղղությամբ Արաքս գետի ափամերձ ճանապարհի կից լանջերին գտնվող ՀՀ ԶՈՒ ստորաբաժանումների դիրքերից առաջ՝ մեր և թշնամու միջև։
Զուգահեռաբար՝ ՀՀ ԶՈՒ ստորաբաժանումները հանվել են տվյալ հատվածում գտնվող իրենց զորանոցից, իսկ հաջորդ քայլով դրանք պետք է դուրս բերվեին նաև իրենց դիրքերից, ինչից հետո արաքսամերձ ճանապարհին կից այդ հատվածը պետք է մնար բացառապես ռուսական սահմանապահների վերահսկողության ներքո։
Այսօր առավոտյան ստացված տեղեկությունների համաձայն՝ որոշումը փոփոխվել է և ՀՀ ԶՈՒ ստորաբաժանումները վերադառնում են իրենց զորանոց։
Հիշեցնում ենք, որ հրադադարից հետո Նռնաձորի հատվածում արևելյան ուղղությամբ արաքսամերձ ճանապարհի պահպանությունն ի սկզբանե հանձնված է ռուսական սահմանապահ զորքերին, իսկ Հայաստան-Իրան սահմանն Արաքսի երկայնքով 1992 թվականից պահպանում են ռուսական սահմանապահները։
Ասվածը փաստում է, որ եթե ռուսական սահմանապահներին անցնի նաև Նախիջևանի ուղղությամբ արաքսամերձ ճանապարհի պահպանությունը, ապա Արաքս գետի երկայնքով ձգվող ամբողջ գոտին՝ հայ-ադրբեջանական շփման գծերի արևելյան և արևմտյան արաքսամերձ հատվածներով, այլևս ամբողջությամբ կլինի բացառապես ռուսական վերահսկողության ներքո։
Ինչպես արձանագրված է 2020 թ. նոյեմբերի 9-ի կապիտուլյացիոն հայտարարությամբ, այդ տարածքով պետք է անցնի Նախիջևանը Ադրբեջանին կապող հաղորդակցային ուղի, որը պետք է վերահսկեն Ռուսաստանի ԱԴԾ ուժերը։
Փաստորեն, Նիկոլ Փաշինյանի դավաճանական ռեժիմն արդեն փորձում է մեկնարկել, այսպես կոչված, Մեղրու միջանցքի ծրագիրը, որը Հայաստանը կկտրի Իրանից և կդարձնի թյուրքական շրջապատման մեջ գտնվող կղզի։
Հայաստանը կործանելու այս ծրագիրն առայժմ խափանվում է աշխարհաքաղաքական միջամտությունների շնորհիվ։ Սակայն հայ ժողովուրդն է լինելու հիմնական գործոնը, որ պետք է բռնի դավաճանի ձեռքն ու չեզոքացնի կործանարար սպառնալիքը»: