«Մեր ազգագրագետներն ընդհատակյա սպասարկում են թավշյա ողբերգությունը»․ Հայկ Դեմոյան

Հայոց ցեղասպանության թանգարան-ինստիտուտի նախկին տնօրեն, պատմական գիտությունների դոկտոր Հայկ Դեմոյանը ֆեյսբուքյան իր էջում գրել է. «ՄԵՐՕՐՅԱ ՈՂԲԵՐԳՈՒԹՅԱՆ ԱՆՁՆԱԳԻՐԸ
Այս երկու լուսանկարները հետաքրքիր են մշակութային մարդաբանության տեսանկյունից, այլ կերպ ասած հիշողության ու հիշատակման մերօրյա երևույթների ուսումնասիրության նյութ կարող են հանդիսանալ։ Չէ, մի կարծեք, թե մեր ազգագրագետները դրա ժամանակն ու ցանկությունն ունեն։ Նրանք տակավին ընդհատակյա կարգով սպասարկում են թավշյա ողբերգությունը․․․
Այսպիսի վերամբարձ տեքստով հուշատախտակը գտնվում է Մաշտոցի պուրակում։ Որևէ համեստ տեքստով հուշատախտակ մի սպասեք որ կտեղադրվի անցյալ ամիս Մաշտոցի պողոտայի վրա ոչնչացված Հայաստանի Հանրապետության ու Արցախի Հանրապետության վերամիավորումը խորհրդանշող խճանկարի տեղում։ Այո, ոչնչացվեց հիշողության համեստ, բայց խորհրդանշական վայր ու այն անարձագանք մնաց։ Չարձագանքեցին անգամ քաղաքական օրակարգեր սպասարկող և տարաբնույթ հիշողությունների ու հիշատակումների հարցերով զբաղվող խիստ քաղաքականացված ազգագրագետները․․․
Ձեռք չի՞ տալիս, ուրեմն օգնության կգա սելեկտիվ մոտեցումը, իսկ այդ պահից սկսած գիտնականի կոչումն ու վաստակը միանգամից զրոյանում է․․․