«ԱԺ-ում ընդդիմադիրներին պետական գաղտնիքը պետք է ամբողջությամբ անմատչելի լինի». Արման Բաբաջանյան

Նախկին պատգամավոր Արման Բաբաջանյանը ֆեյսբուքյան իր էջում գրել է. «Ազգային ժողովում ընդդիմության տեղերն զբաղեցնող անհատներին և ուժերին պետական գաղտնիքը պետք է ամբողջությամբ և առավելագույնս անհասանելի և անմատչելի լինի:

Նրանց մեծ մասը բազմիցս ցույց է տվել, որ բացարձակ հետաքրքրված չէ պետական շահի գերակայությամբ և հանուն քաղաքական կոնյուկտուրայի և նպատակների պատրաստ է օգտագործել անգամ հրապարակման, հանրայնացման ոչ ենթակա հանգամանքներ՝ քարոզչական դաշտում սեփական նպատակները սպասարկելու համար: «Հայաստան» խմբակցության պատգամավորներից մեկը նախօրեին պետական գաղտնիքի ամբողջական հասանելիություն է պահանջել ԱԺ բոլոր, այդ թվում՝ ընդդիմադիր պատգամավորների համար։ Կարծում եմ՝ մինչ այդ պետք է ձևակերպել պետական կարևորագույն խնդիրների հանդեպ քաղաքական ամբողջական դիրքորոշում, ստանձնել խորհրդարանական ընդդիմության կարգավիճակից բխող ամբողջական քաղաքական պատասխանատվություն այդ դիրքորոշումների համար:

Քաղաքական ընդդիմությունը պետական շահի պաշտպանության համար արդեն իսկ ունի բավարար գործիքակազմ հենց խորհրդարանական կարգավիճակի բերումով:

Մաֆիայի, օլիգարխիայի և բանդիտների պարագլուխներին դրանից ավելին ուղղակի հակացուցված է»։