Առանց Էրդողանի Թուրքիայում իշխող կուսակցությունը կհավաքի 20 տոկոսից ցածր ձայն

Թուրքիայում հերթական սոցհարցումն են կատարել երկրի տնտեսական դրության և քաղաքական հարցերի վերաբերյալ բնակչության կարծիքը պարզելու նպատակով։

«+1» հետազոտական ընկերության կողմից անցկացված հարցման արդյունքների համաձայն, հարցվածների մեծամասնությանն անհանգստացնում է Թուրքիայի տնտեսական դրությունը։

Հարցվածների 63.4 տոկոսը կարծում է, որ Թուրքիայի ամենամեծ խնդիրը տնտեսության վիճակն է, 10.7 տոկոսի կարծիքով՝ գործազրկությունը, 7.4 տոկոսը՝ կրթությունը, 5.7 տոկոսը՝ դատական համակարգը։ Իսկ Թուրքիայի ներսում քարոզչական նպատակներող կիրառվող այնպիսի թեմաներ, ինչպիսին է ահաբեկչությունը և փախստականների խնդիրը, հարցվածներից խնդիր է համարում համապատասխանաբար 2.3 և 2.6 տոկոսը։
Հարցվածների 65.8 տոկոսը Թուրքիայում իշխող «Արդարություն և զարգացում» (ԱԶԿ-AKP) կուսակցության տնտեսական քաղաքականությունը գնահատել է անբավարար։

Քաղաքական հարցերից մեկը վերաբերել է 2018-ից Թուրքիայում գործող կառավարման նոր համակարգին։ Մեծամասնությունը՝ 32.6 տոկոսը, հայտնել է, որ նախագահական համակարգից գոհ չէ, 26.1 տոկոսն ընդհանրապես գոհ չէ, 16.4 տոկոսը գոհ է եղել, իսկ 10.2 տոկոսը՝ շատ գոհ։

Ընտրությունների վերաբերյալ հարցման մասնակիցներին խնդրել են պատասխանել, թե արդյոք կքվեարկեն իշխող «Ժողովուրդ» դաշինքի օգտին, եթե Թուրքիայի նախագահ Ռեջեփ Թայիփ Էրդողանը թեկնածու չառաջադրվի։ 67.8 տոկոսը բացասական պատասխան է տվել, առանց Էրդողանի մասնակցության այդ դաշինքի օգտին պատրաստ է քվեարկել 19.3 տոկոսը, 12.9 տոկոսը դժվարացել է կարծիք հայտնել, գրում է «Էրմենիհաբեր»-ը։