«Բա մեկը չկա՞ր՝ զանգեիր, ասեիր՝ «գոնե մի դատապարտող բան ասեք պատերազմն սկսողին»․ Ռոբերտ Քոչարյանը փաստեր նշեց

«Այսօր ուզում եմ շեշտել մի քանի փաստ՝ անհերքելի, անժխտելի։ Փաստ առաջին․ այս իշխանությունն արեց ամեն ինչ՝ պատերազմն անխուսափելի դարձնելու համար․ ձախողեց բանակցային գործընթացը, հարցի քննարկումը բերեց տարածքային ամբողջականության դաշտ, ըստ էության՝ հրահրեց պատերազմ»,- «Հայաստան» դաշինքի կազմակերպած հանրահավաքի ժամանակ ասաց Դաշինքի առաջնորդ, ՀՀ երկրորդ նախագահ Ռոբերտ Քոչարյանը։

«Փաստ երկրորդ՝ այս իշխանությունն արեց ամեն ինչ՝ այս պատերազմում պարտվելու համար՝ գիտակցաբար, թե ոչ, այլևս կարևոր չէ՝ իր սխալ քայլերով, հիմարություններով»,- ասաց Քոչարյանն ընդգծելով, որ պարտությունն սկսվել է շատ ավելի շուտ, «երբ սկսեցին հետապնդել հերոսներին, երբ սկսեցին գլխատել բանակը, կադրային ջարդ իրականացնել», քանզի՝ «իրենց պետք էր ոչ թե մարտունակ, այլ՝ իրենց հավատարիմ բանակ»։

Խոսելով երրորդ փաստի մասին «Հայաստան» դաշինքի առաջնորդն ասաց․ «Ամբողջ 44 օրվա ընթացքում, մենք մենակ ենք մնացել պատերազմի ժամանակ, լիակատար ձախողում է եղել։ Ոչ մի երկիր չի դատապարտել ագրեսիան սկսող պետությանը։ Երկրորդ համաշխարհային պատերազմից հետո այսպիսի բան չի եղել։ Բա մեկը չկա՞ր, որ զանգեիր, ասեիր՝ «գոնե մի դատապարտող բան ասեք պատերազմն սկսողին»․․․, էդ ի՞նչ վիճակում եք հայտնվել, ի՞նչ մեկուսացված վիճակում եք եղել»։