«Սրանց վռնդելո՛ւ ենք՝ կա՛մ բարիկադներով, կա՛մ ընտրություններով, և ես ձեր կողքին եմ լինելու»․ Քոչարյան

«Ի՞նչ ռիսկեր են մեր առջևում՝ կապված Ղարաբաղի հետ։ Շատ է խոսվում դելիմիտացիա և դեմարկացիայի մասին, Զանգեզուրով՝ Սյունիքով, միջանցքի մասին։

Դելիմիտացիան նշանակում է, որ դու ուղղակի կամ անուղղակի, փաստացի ճանաչում ես Ադրբեջանի տարածքային ամբողջականությունը, և դու, ուղղակի, ֆիքսում ես Ղարաբաղի անկլավային վիճակը՝ Ադրբեջանի ներսում»,- «Հայաստան» դաշինքի հանրահավաքի ժամանակ իր ելույթում ասաց Դաշինքի առաջնորդ Ռոբերտ Քոչարյանը՝ նշելով, որ դա վերջ է դնելու Ղարաբաղի հարցի կարգավորմանը։

«Սա նշանակում է, որ մնալու է միայն մեկ լուծում՝ Ղարաբաղի կարգավիճակը՝ Ադրբեջանի կազմում։ Այլ լուծում դելիմիտացիան ուղղակի չի թողնելու։ Դելիմիտացիան իրականացնելուց հետո, Ադրբեջանը ստանալու է լեգիտիմ իրավունք՝ ցանկացած պահի, երբ ուզի, Հայաստանը Ղարաբաղին կապող սահմանին դնել իր մաքսային կետը և ամբողջությամբ վերահսկել ամբողջ շարժը, և ոչ մեկը չի կարող նրան խանգարել, քանի որ դա լինելու է օրինական քայլ»,- ասաց Ռ․ Քոչարյանը։

«Պայքարելո՛ւ ենք, սրանց վռնդելո՛ւ ենք՝ կա՛մ բարիկադներով, կա՛մ ընտրություններով, յուրաքանչյուր ճանապարհներով, և ես ձեր կողքին, ձեր առաջ կանգնած եմ լինելու»,- խոսքը եզրափակեց ՀՀ երկրորդ նախագահը։