«Համանախագահների հայտարարության մեջ ուշադրության է արժանի երկու հանգամանք». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրում է. «ԵԱՀԿ Մինսկի խմբի համանախագահների հայտարարության մեջ, որը հաջորդել է Հայաստանի ու Բաքվի արտգործնախարարների հետ նրանց հանդիպմանը, հատկապես ուշադրության է արժանի երկու հանգամանք:

Նրանք նշում են, որ քննարկվել է նոյեմբերի 9-ի հայտարարության պայմանավորվածությունների կատարման ընթացքը: Նկատենք, փաստորեն նոյեմբերի 9-ի եռակողմ հայտարարության հարցերը քննարկվում են Մինսկի խմբի համանախագահության ձևաչափում: Թե ինչ շեշտադրումներով, ինչ առաջնահերթություններով՝ սա էլ մեկ այլ հարց է:

Եվ այդ հարցի համատեքստում էլ ուշադրության է արժանի, որ խոսվում է գրեթե բացառապես մարդասիրական խնդիրների լուծումների մասին: Այդ առումով էլ նկատենք, որ այդ ասպեկտը 2020 նոյեմբերի 9-ից հետո շեշտադրում էր Մոսկվան, ասելով, որ պետք է մարդասիրական խնդիրները լուծել, որ ձեւավորվի քաղաքական խնդիրները ավելի հեշտ քննարկելու միջավայր:

Այդպիսով հարց է առաջանում, արդյո՞ք համանախագահ երեք երկրները եկել են այն մոտեցումներին, որ «դավանում» էր Մոսկվան: Սա էլ իր հերթին կարող է հարց առաջացնել, թե դրա դիմաց ինչ կարող էր զիջել Մոսկվան և որ հարցում՝ Կովկասում, թե՞ դրանից դուրս: Իհարկե մեկ հայտարարությունը ըստ էության ոչինչ է, գործընթացն է ամեն ինչ և իրավիճակի գնահատումը առավել ստույգ կարող է լինել գործընթացի դինամիկային հետեւելու պարագայում:
Ամիսներ առաջ եմ նշել, որ առկա է ԱՄՆ, Ֆրանսիա, ՌԴ քննարկում և Ադրբեջանը բավականին անհանգիստ է այդ քննարկումներից: Դա վերհաստատում են Բաքվի վերջին օրերի գործողությունները:
Կրկնեմ նաև, այդ ամենն իհարկե մեզ համար ավելի ու ավելի շատ աշխատելու, այլ ոչ թե հանգստանալու հիմք է, որովհետեւ համաշխարհային միջավայրը դեռ շատ երկար ժամանակ է մեզ համար լինելու վտանգահարույց ու բարդ: Բայց, հիմք չկա նաև ընդամենը անձնական կամ կուսակցական նկատառումներով ապոկալիպսիս քարոզելու, առավել ևս, երբ շատերի համար հենց դա է այսօր աշխատանք»: