Ըստ Ալեն Սիմոնյանի, հայկական զորքը չի նահանջել, բայց 4 դիրքից դուրս է եկել

ՀՀ ԶՈՒ չորս մարտական դիրքերը որևէ մեկի կողմից չեն վերահսկվում, լրագրողների հետ զրույցում պնդեց ԱԺ նախագահ Ալեն Սիմոնյանը: «Ադրբեջանական զորախումբը, որն առաջ էր եկել, արդեն հետ է քաշվել։ Իսկ 4 հենակետեր կան, որոնք որևէ մեկի կողմից չեն վերահսկվում. այդ հենակետերը դիրքերի փոփոխության արդյունքում ուղղակի դատարկ են։ Հայկական զորքը չի նահանջել. այդտեղ մի քանի հենակետ է եղել, որոնք այս պահին ո՛չ հայկական, ո՛չ էլ ադրբեջանական կողմից չեն վերահսկվում»,- ասաց Սիմոնյանը։
Լրագրողի ուղիղ հարցին, թե մեր զինվորները, փաստորեն, դուրս են եկել այդ դիրքերից, Սիմոնյանն արձագանքեց. «Այո, այդ 4 դիրքերից մեր զինվորները դուրս են եկել»։ Նա հավելեց, որ այդ լանդշաֆտն օգտագործելը ձեռնտու չէ Ադրբեջանին։