«Իրանը զգում է, որ ընդդեմ ԱՄՆ-ի՝ չի կարողանում շահել Ռուսաստանի, Չինաստանի և Եվրոպայի համակրանքը և չափավորում է իր պահանջները». իրանագետ

Իրանագետ Տիգրան Դավուդյանի գրառումը. «Վիեննայի բանակցություններ-4: Իրանի միջուկային ծրագրի ռազմական օգտագործումը կանխելու համատեղ համապարփակ գործողությունների ծրագրի իրագործման փորձագիտական խմբերը շարունակում են իրենց աշխատանքը և ըստ երևույթին մոտենում են փոխզիջումային տարբերակի։ Իրանը զգում է, որ ընդդեմ ԱՄՆ-ի՝ չի կարողանում շահել Ռուսաստանի, Չինաստանի և Եվրոպայի համակրանքը և չափավորում է իր պահանջները։ ԱՄՆ-ն ևս պատրաստվում է հրաժարվել մի շարք պատժամիջոցերից, որպեսզի ազատվեն Իրանի սառեցված գումարներից մեկ մասը և երկրի տնտեսությունը կարողանա շնչել։ Մեծ Բրիտանիայի արտաքին գործերի նախարար տիկին Լիզ Թրասը երեկ «Մեծ Յոթնյակ»ի նիստի ավարտին հատուկ հայտարարությամբ շեշտեց, որ․ «Սա Իրանի համար վերջին հնարավորությունն է՝ ՄԱԿ-ի Անվտանգության Խորհրդի (ԱԽ) դրույթների վրա հիմնված լուրջ լուծումով բանակցությունների սեղանի շուրջ նստելու համար․․․ Մենք Իրանին թույլ չենք տա միջուկային զենք ձեռք բերել։ Կարևոր է, որ նրանք գան բանակցությունների սեղանի շուրջ և լուրջ լինեն բանակցություններում»։ Իրանը չի ցանկանում է, որ իր խնդիրը ՄԱԿ-ի ԱԽ հասնի, որովհետև այնտեղի պատժամիջոցներն ավելի դաժան և միջազգային են լինելու։ Տարածաշրջանում ևս աշխույժ են պաշտոնատար անձանց փոխադարձ այցելությունները․ Սաուդական Արաբիայի թագաժառանգը Պարսից Ծոցի արաբական երկրներում է և պատրաստվում է «Պարսից Ծոցի համագործակցության» (Gulf Cooperation Council) Գագաթաժողովի բացման և մի աննախընթաց այցելությամբ Իրանի հարավային հարևան՝ Արաբական Միացյալ Էմիրություններում, է Իսրայելի վարչապետը։ (Լուսանկարներում ՄԲ արտգործերի նախարար Լիզ Թրաս և ՌԴ ներկայացուցիչ Միխայիլ Ուլիանով)»: