«Մի նոր Երզնկայի պայմանագիր է պատրաստվում»․ Աղասի Ենոքյան

Քաղաքագետ Աղասի Ենոքյանի գրառումը․ «Կարգին Հայկոն ընկերացել է Քոչարյանի ընկերների հետ, գլխավոր դատախազը դհոլ է խփում, Ալենը գերիների մասին վատ բան է ասել, Ասպրամը մեջքով էր նստել, արանքում էլ ակնարկներ, թե չաղ Վահագը կոմայգու կլիենտ է. սրանք են այսօր Հայաստանի մամուլի ու քաղաքական գործիչների կողմից քննարկվող թեմաները։
Մոռացել են Արցախի ինքնորոշման մասին, 3+3-ը թողել են Ռուսաստանի ու Թուրքիայի բարեհաճությանը, դելիմիտացիայի ու դեմարկացիայի հանձնաժողով է ստեղծվում, որն արդեն թակում է մեր դուռը. սրանք են մեր ապագան կանխորոշող հարցերը, սրանք են պայմանավորելու մեր անվտանգությունը, որոշելու՝ Հայաստանի Հանրապետությունում ենք ապրելու, Թուրքիայի վիլայեթում, թե Ռուսաստանի գուբերնիայում։
Թե չէ՝ Կարգին Հայկոյի մայմունությունները երբեք էլ նորություն չեն եղել, նա հենց որպես միմոս է հայտնի հանրությանը։ Ոչ էլ դատախազն է նոր սկսել դհոլ խփել. նա այնքան արհեստավարժ էր նվագում, որ ակնհայտ է, դա հնուց է, նախկինների ժամանակ էլ է դհոլչի եղել։ Ալենը այսօր գերիների մասին է խոսում, վաղն էլի ասֆալտի տենդեր է շահելու. դա իր պաշտոնից բխող օրինաչափություն է։ Ասպրամն այսօր մեջքով էր նստել, վաղը դեմքով կնստի. հետո ի՞նչ։ Իսկ չաղ Վահագի վարքից ակնհայտ է, որ նա առնվազն հոգեբանական շեղումներ ունի։ Այս հարցերը չեն կարող լինել այսօրվա Հայաստանի հիմնական օրակարգը, երբ երկիրը կործանման առաջ է կանգնած։
Ողջ աշխարհն ասում է, որ Արցախի հարցը լուծված չի, որ դա ինքնորոշման հարց է, որ Մինսկի խումբն է այս խնդրով դեռ զբաղվելու, իսկ դուք խուսափում եք Արցախի անունն անգամ տալուց։ Ընդդիմություն եք, թե իշխանություն՝ գնացեք վիժեցրեք 3+3-ը և դեմարկացիան, մի նոր Երզնկայի պայմանագիր է պատրաստվում, որով ոչ թե Մեծ Հայքը, այլ փոքրիկ Հայաստանն է բաժանվելու երկու կայսրությունների՝ Թուրքականի ու Ռուսականի միջև։ Գնացեք, ջարդեք Մոսկվայի ու Բրյուսելի դռները, շուռ տվեք խորհրդարանի ամբիոնը, փողոց դուրս եկեք, ամեն ինչ արեք, բայց թույլ մի տվեք, որ երկիրը կործանեն։
Թե չէ՝ Հայկո ու Ալեն, Ասպրամ ու դատախազ. այս ի՞նչ տուն-տունիկ եք իրար հետ խաղում երկրի փլուզվող տանիքի տակ»։