«Սա հատված է Իլհամ Ալիևի հարցազրույցից»․ Տաթևիկ Հայրապետյան

ԱԺ նախկին պատգամավոր Տաթևիկ Հայրապետյանը ֆեյսբուքյան իր էջում գրել է. ««Կարևոր է, որ Հայաստանի կառավարությունը գնա հարաբերությունների կարգավորման, առաջնորդի հանրային կարծիքը և համոզի, որ Հայաստանի համար զարգացման միակ ճանապարհը Ադրբեջանի և Թուրքիայի հետ հարաբերությունների կարգավորումն է: Հայաստանը պետք է դառնա նորմալ հարևան և զերծ մնա տարածքային պահանջներից...», սա հատված է Իլհամ Ալիևի՝ իսպանական «El Pais» լրատվականին տված հարցազրույցից: Սա նույն Իլհամ Ալիևն է, որը ժամանակին հերոսացրեց քնած հային կացնահարողին, այն նույն Ալիևը, որը հայերին «շների պես» դուրս էր քշում Ղարաբաղից, դա նույն Ալիևն է, ով առավոտից երեկո տարածքային հավակնություններ է ներկայացնում ՀՀ սուվերեն տարածքի, ընդհուպ մինչև՝ մայրաքաղաք Երևանի նկատմամբ: Ալիևը, իհարկե, չի փոխվել, փոխվել է նրա քաղաքականությունը, քանի որ նա նպատակ ունի բթացնել հայ հասարակության զգոնությունը, խոստանալ զարգացում և հետո վերջնականապես կործանել հայոց պետականությունը: Ցավն այն է, որ մեզ մոտ հանրային ու քաղաքական մտքում չկա այս պարզ գիտակցումը, ընդհակառակը՝ որոշ շրջանակներ չգիտեմ հավատալով, թե այլ դրդապատճառներով ակտիվորեն քարոզում են, որ Ադրբեջանը փոխվել է և հնարավոր է խաղաղ ապրել: Հնարավոր չէ դա, քանի որ «խաղաղասեր» Ալիևը շարունակում է պետական մակարդակով ատելություն քարոզել հայի դեմ, ադրբեջանական դասագրքերում սովորեցնում են ատել հային և հավակնել Հայաստանի տարածքին: Սա է պարզ ու անհերքելի իրականությունը, իսկ Հայաստանում կան Ալիևի «խաղաղությանը» հավատացողներ և դրա քարոզիչներ, մինչդեռ Ալիևը կանգ չի առնի ոչ հերթական ցեղասպանության իրագործման, ոչ էլ այլ ոճրագործ քայլերի գնալու համար: Այս հարցում նա ունի Էնվեր փաշայի ոգին վկայակոչող Էրդողանի անթաքույց աջակցությունը...»։