«Ինձ ապշեցնում է ՍԴ որոշումներն աբսուրդի հասցնելը»․ Ռոբերտ Քոչարյան

Այսօր՝ Ռոբերտ Քոչարյանի և Արմեն Գևորգյանի գործով դատական նիստի ժամանակ, քննվում էր Արմեն Գևորգյանի միջնորդությունը ՀՀ-ից ժամանակավորապես բացակայելու վերաբերյալ։

Դատախազ Պետրոս Պետրոսյանը առարկեց ներկայացված միջնորդության դեմ։ Նրա խոսքով՝ ներկայացված միջնորդության հիմնավորումները խեղաթյուրում են ՍԴ որոշումը։

«ՍԴ որոշման մեջ խոսվում է պատգամավորի անձեռնմխելիության մասին: Դա ի՞նչ կապ ունի Արմեն Գևորգյանի հետ, նա պատգամավորական անձեռնմխելիությունից չի օգտվում, քանի որ սահմանադրական կարգավորումները վերաբերում են քրեական հետապնդում հարուցելու կապակցությամբ անձեռնմխելիությանը: ՍԴ-ն արձանագրել է, որ այս կապակցությամբ քննարկելու որևէ հարց չկա: Կոնտեքստից կտրել ՍԴ դիրքրոշումները և դա ներկայացնել որպես ԱԺ պատգամավորի գործունեության հնարավորությունները ցանկացած գնով անսահմանափակ դարձնելու միջոց, ճիշտ չէ»,- ասաց դատախազը։

«Ինձ ապշեցնում է ՍԴ որոշումներն աբսուրդի հասցնելը, անհեթեթ բաներ է ասվում․․․ Այս երկրի պարտականությունն է ապահովել Արմեն Գևորգյանի մասնակցությունը ԵԽԽՎ նիստին: Ես ուղղակի զարմանումեմ այս ամեն ինչի վրա»,-անդրադառնալով դատախազի խոսքերին՝ ասաց Քոչարյանը։ Դատարանը, լսելով կողմերի դիրքորոշումները, դատական նիստը հետաձգեց մինչև 2022թ հունվարի 18-ը, ժամը՝ 13.00-ն։