«Ալիևի հետ հանդիպումից հետո որոշակի հնարավորություններ տեսա, որոնք պետք է փորձենք օգտագործել»․ Փաշինյան

«Ավտոճանապարհների հետ կապված մեր սկզբունքային դիրքորոշումը մնացել է նույնը»,- այսօր՝ առցանց ասուլիսի ժամանակ ասաց ՀՀ վարչապետ Նիկոլ Փաշինյանը։
«Բրյուսելում ես և Ադրբեջանի նախագահը փորձեցինք մտնել մանրամասների մեջ, հասկանալ՝ ինչն է պատճառը, որ մենք արտահայտում ենք այսպիսի դիրքորոշումներ, որովհետև հրապարակային հնչող դիրքորոշումներն այսբերգի երևացող կողմն են։ Բայց կան խնդիրներ, որոնց պատճառով մենք այս կամ այն դիրքորոշումն ենք արտահայտում»,- նշեց վարչապետը։
«Երբ մտանք մանրամասների մեջ, անկեղծ ասած, այդ քննարկման ժամանակ տեսա հնարավորություն, որ մենք կարող ենք գալ որոշակի լուծումների, որտեղ թե՛ մեր դիրքորոշումները, թե՛ Ադրբեջանի առաջ քաշած զուտ գործնական խնդիրները կարող են իրականում լուծում ստանալ», - ասաց նա՝ ընդգծելով, որ այդ մասով որևէ պայմանավորվածություն չունեն։
«Պարզապես այդ հանդիպումից հետո ես որոշակի հնարավորություններ տեսա, և այդ հնարավորությունները մենք պետք է փորձենք օգտագործել, որպեսզի այս հարցում իրական կոմպրոմիսային լուծում գտնենք, որը չի հատում մեր այն կարմիր գծերը, որոնց մասին ևս արդեն ասել եմ»,- նշեց Փաշինյանը։