«Եթե տեսնենք, որ «3+2» ձևաչափը ՀՀ շահերին չի համապատասխանում, չենք մասնակցի»․ Նիկոլ Փաշինյան

Այսօր՝ առցանց ասուլիսի ժամանակ, վարչապետ Նիկոլ Փաշինյանը նշեց, որ «3+2»-ում Հայաստանի ներկայացուցչի զեկույցից հետո դրական տպավորություններ են ստացվել, միաժամանակ նշելով, որ դա չի նշանակում, թե ռիսկեր չկան։
«Ընդհանուր առմամբ, «3+2» ձևաչափը համապատասխանում է կառավարության ծրագրում մեր ձևակերպած այն դիրքորոշումներին, թե մենք ուզում ենք տարածաշրջանային խոսակցություններին մասնակից լինել։ Եթե մենք հիմա բանակցում ենք Ադրբեջանի հետ, եթե մենք հիմա արդեն բանակցելու ենք Թուրքիայի հետ երկկողմ ձևաչափով, Իրանի հետ մեր երկխոսությունը մշտական է, ՌԴ-ն մեր ռազմավարական գործընկերն է, այսինքն՝ բոլորի հետ առանձին-առանձին խոսում ենք, անտրամաբանական կլինի, ասել՝ այդ միջավայրում չենք ուզում խոսել», - ասաց Փաշինյանը։
Վարչապետը միաժամանակ չբացառեց որևէ պահի «3+2»-ում դիրքորոշման փոփոխության հավանականությունը։
«Եթե տեսնենք, որ այդ ձևաչափը ՀՀ շահերին չի համապատասխանում և պրոցեսները գնում են այնպես, որ մեր շահերին հակադրվում են, մենք չենք մասնակցի այդ պրոցեսին։ Բայց նախնական տպավորությունները դրական են, ինչը չի նշանակում, որ հաջորդ հանդիպումները կլինեն նույնկերպ», - ասաց Փաշինյանը։