«Արդյո՞ք այս մարդը մոռացել է իր իսկ անցած ուղին». Զառա Հովհաննիսյան

Իրավապաշտպան, հրապարակախոս Զառա Հովհաննիսյանը ֆեյսբուքյան իր էջում գրել է. «Երբ ՀՀ վարչապետը շնորհավորեց Լուկաշենկոյին, երբ Բելառուսի փողոցները լցված էին ցուցարարներով, որոնց դեմ կիրառվում էին բռնի ճնշման մեթոդներ, բելառուսները զարմացել էին։ Ասում էին՝ ախր ինքն է նույն խաղաղ ոչ բռնի պայքարի մեթոդով եկել, ո՞նց է շնորհավորում նրան, ում ժողովուրդը չի ընդունում։

Երբ ՀՀ վարչապետը Ղազախստանում հեղուկ գազի գնի կտրուկ բարձրացման որոշման դեմ սկսված բողոքի ակցիաները ճնշելու նպատակով նախաձեռնեց ՀԱՊԿ միավորումներ մտցնել, ղազախներն ապշեցին, թե ախր հենց Փաշինյանն այդպիսի իրադարձությունների ակտիվ մասնակից է եղել, ոչ մեկ անգամ։

Ի դեպ, եթե հիշենք 2008 թվականը, ապա Երևանի փողոցներում ևս խաղաղ ցուցարարներին զուգահեռ գործում էին թալանող և վառող կազմակերպված բրիգադներ, որոնց հղում տալով այդ ժամանակվա վարչախումբը՝ հայտարարում էր, թե ցուցարարները բռնարարքներ են իրականացնում։

Դա լիովին նույն ձեռագիրն է, որը տարբեր երկրներում իրագործվում է։ Ռեժիմները ժողովրդի հետ վարվում են անմարդկային կերպով՝ ճնշելով բոլոր ազատությունները, հարստահարելով և հարստանալով, իսկ ընդվզող ժողովրդին հետո անվանելով դրսի ուժերի կողմից հրահրված, միաժամանակ ձևավորելով հրոսակախմբեր, որոնք կվարկաբեկեն շարժումները՝ գործելով թալանի ու բռնության դիրքերից։

Հիմա հարցն այն է, թե արդյո՞ք այս մարդը, որը շնորհավորում է Լուկաշենկոյին, զորք է մտցնում Ղազախստան, մոռացել է իր իսկ անցած ուղին՝ 2008-ի մարտի 1-ից մինչև 2018-ի մայիսի 8-ը, և էլ ինչ կարելի է սպասել նրանից։

Արդեդն որևէ բանի վրա չեմ զարմանում, ու դա շատ վատ է»։