Չորեքշաբթի, 26 հունվարի, 2022 թ.
|
Ստեփանակերտում`   +2 °C

«18-19 տարեկան երեխեքը չպետք է առաջնագծում լինեն»․ Գայանե Աբրահամյան

«18-19 տարեկան երեխեքը չպետք է առաջնագծում լինեն»․ Գայանե Աբրահամյան
129
Չորեքշաբթի, 12 հունվարի, 2022 թ., 11:24

ԱԺ նախկին պատգամավոր Գայանե Աբրահամյանի գրառումը․ «Երեկվանից ունենք արդեն երրորդ զոհը (ըստ՝ ՊՆ այսօրվա հաղորդագրության) բոլորը 18, 19 տարեկան երեխեք, որ չէին հասցրել կյանք տեսնել, գուցե չէին հասցրել անգամ սիրահարվել... ու մենք մեր ցավը կարտահայտենք այս հարթակում, կզայրանանք, անզորությունից կգոռանք ու վերջ, կանցնենք մեր առօրյա խնդիրներին, մինչդեռ պետք է իրապես գործել, այլևս անթույլատրելի է.
Համախմբվենք ու պահանջենք.

- Մոբիլիզացնել հնարավոր ողջ ներուժը, անցնել խիստ խնայողական ռեժիմի, բացառել այս պահին ոչ ԽԻՍՏ անհրաժեշտ ծախսերը, բացառել որևէ պարգևավճար, հաստատել ԲԱՑԱՌԱՊԵՍ ԽԻՍՏ անհրաժեշտ գործուղումները և բյուջեի հիմնական ռեսուրսը ծախսել ՊԱՅՄԱՆԱԳՐԱՅԻՆ զինծառայողների ներգրավման և այդ կարողության մեծացման վրա, օր առաջ դուրս բերել առաջնագծից ժամկետային զինծառայողներին, 18-19 տարեկան երեխեքը ՉՊԵՏՔ է առաջնագծում լինեն, մի ողջ սերունդ այսպես կորցնելու իրավունք չունենք։

- ՀՐԱՏԱՊ դիմել միջազգային դերակատարներին սահմանի ողջ երկայնքով անվտանգության գոտիներ ստեղծելու և ԵՄ կամ ԵԱՀԿ մոնիթորինգային խմբեր ձևավորելու համար, ինչպես արվում էր Վրաստանում՝ սահմանային հիմնական լարված հատվածներում։

Վստահ չեմ, թե ԱԳՆ և ԱԺ պաշտոնյաները այս ուղղությամբ բավարար քայլեր ձեռնարկել են (երեկ ԱԳՆ-ն, հերթական անգամ, գրել է հայելային հետքաշման մասին, որն այս ամիսների ընթացքում հստակ ցույց տվեց, որ ոչ միայն անօգուտ է, այլև՝ կրկնապատկում է Ալիևի սանձարձակությունը), այս պատճառով կարծում եմ պետք է ոչ թե այս հարթակում զայրույթ գեներացնենք ու լացուկոծ դնենք, այլ ՀԱՆՐԱՅԻՆ ՊԱՀԱՆՋ ձևավորենք, ցույցեր ու հավաքներ կազմակերպենք, նամակներ և հանրագրեր ուղարկենք՝ պահանջելով անվտանգության գոտու ստեղծումը և մոնիթորինգային խմբերի հրատապ ներգրավումը։

Այլևս չենք կարող այսպես ամեն օր կարդալ լուրեր զոհերի մասին, գործել է պետք։ Գիտեմ, որ կասեք պահանջները կարող են շատ ավելին լինել, ես այս երկուսն առանձնացրել եմ որպես, այս պահին, լիովին իրականանալի և արագ իրագործելի լուծումներ, բայց կարող եք նաև ավելացնել»։