«Քաղաքացիական շարժումների անշարժ լինելը շատ պատճառներ ունի»․ Արման Վարդանյան

Ռեժիսոր Արման Վարդանյանի գրառումը․ «Ի՞նչու են Հայաստանում քաղաքացիական շարժումները դադար առել։
Շատերը այդ հարցը գռեհիկ ձևերով են ձևակերպում, մեջը մեղադրանք համեմելով, երբեմնի այդ պայքարներում եղած քաղաքացիներին մեղադրելով պասիվության մեջ։
Կարծում եմ քաղաքացիական շարժումների անշարժ լինելը շատ պատճառներ ունի․
1. շատերը կարծում են, որ երկրում անիմաստ է քաղաքացիական շարժումներով խնդիրներ լուծելը, քանի որ խնդիրները գլոբալ քաղաքական են և մինչև կոմպլեքս չլուծվի, առանձին վերցրած պայքարելով արդյունք չի լինի։
2. քաղաքացիական պայքար չի ձևավորվում, քանի որ այս պահին բողոքի դրսևորումները ատոմիզացված են և բողոքի ազդեցիկ խմբեր դեռ չեն ձևավորվում։
3. քաղաքացիական պայքար մղող նոր սերունդ ձևավորված չլինելը։
4. Քաղաքացիական պայքարների դեմ, իրենց իբր ընդդիմադիր հռչակած ուժերի արշավները, որը գուցե, ինչ-որ քաղաքացիների շրջանակի վրա ազդում է (օրինակ՝ Ղարաբաղը հանձնեցին ձեն չհանեցիք, ԱՊՊԱ-ի թանկացման համար ակցիա եք անում) և նման բազում ստոր, անբարո մեղադրանքներ։
5. Կառավարող վարչակազմը ծանոթ լինելով քաղաքացիական պայքարներին ձևավորման փուլերին, դրանք հաջողությամբ կասեցնում է դեռ առանձին վերցրած անհատների մակարդակում։
6. Հուսահատություն, հանձնված վիճակ։
7. Երբեմնի պայքարների, ակտիվ մասնակիցների տարիքի հետ կապված, ընտանեկան մարտահրավերներ։
8. Ժամանակին քաղաքացիական պայքարներում եղած, բայց հիմա կառավարող ուժի մեջ գտնվող քաղաքացիների շահերի փոփոխությունները։

Պատճառներն ինչպես տեսնում եք շատ են, չնայած նրան, որ մարտահրավերը քիչ չեն։

Թվում է՝ սա վերջն է, բայց իրականում ժամանակը իր գործը կանի, իսկ ժամանակները հիմա արագ են փոխվում»։