«Արդյոք Ռուսաստանը կանգ կառնի՞ և Կիևի հետ կքննարկի՞ այդօրինակ հարցեր». Ա. Բաբաջանյան

«Հանուն Հանրապետության» կուսակցության նախագահ Արամ Բաբաջանյանի գրառումը. «Ուկրաինայի նախագահ Զելենսկին իր հերթական ելույթում հայտնել է, որ Ուկրաինան այսօր մենակ է Ռուսաստանի ագրեսիայի դեմ, բոլորը հայտնում են աջակցություն, սակայն ոչ ոք չի ուզում կռվել իրենց հետ միասին: Ուկրաինայի նախագահի ելույթն անկասկած խոսում է բավականին ծանր իրադրության մասին:

Ելույթն ինքնին փաստորեն մի կողմից կարող է դիտվել բանակցության առաջարկ Մոսկվային, մյուս կողմից «վերջնագիր» Արևմուտքին՝ կամ վճռորոշ համարժեք քայլեր ռուսական ներխուժումը կանգնեցնելու և հետ մղելու ուղղությամբ, մենակ չթողնելով Ուկրաինային, կամ Կիևն այդ խնդիրը լուծելու համար պատրաստ է քննարկել Ռուսաստանի պայմաններն ու հրաժարվել Արևմուտքի հետ կապված պլաններից:

Իհարկե, այդ հարցում էական է լինելու և այն, թե ինչպիսի ազդակ կգնա ուկրաինական հասարակությունից, Զելենսկուն «կլիազորե՞ն» չեզոքության հարց քննարկել Մոսկվայի հետ: Հազիվ թե. Զելենսկին այդ քայլին գնում է ժամանակ շահելու նկատառումով՝ ժամանակն այս դեպքում իր և Ուկրաինայի օգտին չէ:

Ինչ արձագանք կլինի Արևմուտքից, արդյո՞ք կփոխվի վերաբերմունքը և տնտեսական ու քաղաքական պատժամիջոցներից զատ, կկայացվի Ուկրաինային ավելի գործուն միջոցներով, այլ կերպ ասած՝ ռազմական օգնության հնարավորությունը: Սա կնշանակի համաշխարհային աղետի սկիզբ և քիչ հավանական է, որ Արևմուտքը գնա այդ քայլին:

Սակայն, հարց է նաև, թե արդյոք Ռուսաստանը կանգ կառնի և Կիևի հետ կքննարկի այդօրինակ հարցեր, թե՞ կփորձի պարզապես գնալ հարցերը միանձնյա լուծելու ճանապարհով»: